स्थायी समिति बैठक शनिबारसम्म आइपुग्दा…

जन आस्था
१५ असार २०७७, सोमबार ०८:३१
[post-views]

सरकारका अति निकटबाहेक अरु सबैले सरकारको काम कारबाहीको चर्को आलोचना गरेको सन्दर्भमा अब ‘मेरो गोरुको बाह्रै टक्का’ भन्ने अवस्थामा सरकारको नेतृत्वमा रहेका कमरेडहरू पनि रहनसक्ने अवस्था छैन । बहुमत छ भन्दैमा कसैले पनि विवेक गुमाउन नहुने अर्काथरी कमरेडहरूको पनि निचोड छ ।

गत बुधबारदेखि शुरु नेकपाको स्थायी समिति बैठकको दोस्रो दिन शुक्रबार अध्यक्ष तथा प्रधानमन्त्री केपी शर्मा ओली अनुपस्थित हुनुभयो । बैठकस्थलबाट मुश्किलले सय मीटरको दूरीमा रहनुभएका अध्यक्षले सरकारी काममा व्यस्त हुनुपरेकाले अर्का अध्यक्षको उपस्थितिमा बैठक सञ्चालन गर्दै गर्न र आफू पछिसम्म बैठकमा सहभागी हुने खबर महासचिवमार्फत् पठाउनुभएको थियो । तर बेलुकीसम्म पनि उहाँ बैठकमा उपस्थित हुनसक्नु भएन । कतिपयले सरकारी कामले व्यस्त हुनुपरेकाले र कतिपयले गाथमा आराम नभएकाले बताए पनि प्रधानमन्त्री सरकारी निवासको करेसामै भएको स्थायी समितिको बैठकमा पुग्न सक्नुभएन ।

शनिबारको तेस्रो दिनको बैठकमा भने शुरुमै पुग्नुभयो । तर,मुश्किलले पच्चिस मिनेट बसेपछि केहीपनि नबोली अर्का अध्यक्षलाई आफूलाई सञ्चो नभएको जानकारी गराएर हलबाट निस्कनुभयो । तीन दिनसम्म भएको बैठकको पाराले ‘समय मात्र घर्काइएको’ अर्थ लगाउन थालिएको छ । अर्को बैठक भोलि मंगलबार बिहान ११ बजे बोलाइएको छ । आइतबार तत्कालीन एमाले महासचिव मदन भण्डारीको जन्मजयन्ती र सोमबार असार १५ अर्थात् धान दिवस र दही चिउरा खाने दिन परेकाले बामदेवसहितको समर्थनमा बैठक मंगलबार पुगेको हो ।

बालुवाटारको त्यहि कम्पाउण्ड र त्यहि बैठक कक्षमा शुक्रबार र शनिबार स्थायी समितिको बैठकमा उपस्थिति जनाउन गाह्रो भएपनि आइतबार दिउँसो त्यहि ठाउँमा प्रधानमन्त्री गर्जनुभएको छ । तर,सन्दर्भचाहिँ  स्थायी समितिको बैठक नभएर मदन भण्डारी फाउण्डेशनले आयोजना गरेको मदन भण्डारी जन्मजयन्ती कार्यक्रम हो ।

बैठकका सहभागीहरूलाई नजिकबाट नियालेका एकजना नेताका अनुसार ‘सहमतिबाट अघि बढ्नुको विकल्प नभएकोमा सबैजना देखिन्छन् ।’ सरकारपक्षीय समूह पनि त्यसैको वरिपरी रहेको बताइन्छ । तर, प्रधानमन्त्रीले मुख नखोलुञ्जेल उक्त समूहको कुनै अर्थ नरहने स्रोतको दाबी छ ।

हिजोका दिनमा जे भएपनि आगामी दिनको लागि अब सरकारसामु पार्टीको संस्थागत निर्णय मानेर हिँड्नुको विकल्प छैन । यतिखेर सरकारका अति निकटबाहेक अरु सबैले सरकारको काम कारबाहीको चर्को आलोचना गरेको सन्दर्भमा अब ‘मेरो गोरुको बाह्रै टक्का’ भन्ने अवस्थामा सरकारको नेतृत्वमा रहेका कमरेडहरू पनि रहनसक्ने अवस्था छैन । बहुमत छ भन्दैमा कसैले पनि विवेक गमाउन नहुने अर्काथरी कमरेडहरूको पनि निचोड छ ।

सरकारको नेतृत्व परिवर्तन गर्नुपर्ने आवाजलाई प्रधानमन्त्री निकटस्थ समूहले ‘चार वर्षअघि चीनसँग पारवहन सम्झौता गरेको कारण पहिलो पटक सत्ताबाट हठात् हटाइएको र यसपटक भारतले अतिक्रमण गरेको भूमि फिर्ता ल्याउने पहल गरेपछि त्यहि नियति भोगाउन खोज्दैछन्’ भन्ने निचोड निकालेको बताइन्छ । तर,सरकारको कामकारबाहीले आगामी आवधिक निर्वाचनमा पार्टी कुन मुखले जनतासामु जाने भन्ने अर्काथरी कमरेडहरूको पिरलो छ ।

यसमा तपाइको मत

Your email address will not be published. Required fields are marked *


*