बाढीमा बेपत्ता हुनेको संख्या थपियो, ५५ जनाको उद्धार

चीनको तिब्बतमा परेको अविरल वर्षाका कारण रसुवागढीस्थित सिमानामा आएको बाढीमा परेर बेपत्ता हुनेहरुको संख्या १८ पुगेको छ । जसमा नेपाल प्रहरीका तीन कर्मचारीसहित नौ सर्वसाधारण र ६ जना चिनियाँ नागरिक छन् ।  

यसअघि बिहान जिल्ला प्रशासन कार्यालय रसुवाले बाढीमा १५ जना बेपत्ता भएको जानकारी गराएको थियो । तर, पछिल्लो अपडेटमा उक्त संख्या १८ रहेको उल्लेख छ ।  

सिडिओ कार्यालयका अनुसार प्रहरीतर्फ लालबहादुर श्रेष्ठ, मुन्ना ठाकुर र लोकेन्द्र बोहरा बेपत्ता छन् । त्यस्तै, बर्दिया घर भएकाहरु जिपन चौधरी, सन्तोष दहित, बुद्धिराम थारु, लक्ष्मीनारायण थारु, सुरेश थारु, बागलुङका नरेन्द्र विक, सिन्धुपाल्चोकका फुर्वा लामा, गोविन्द मोक्तान, लोकमान तामाङको पनि पत्तो लागेको छैन । 

यस्तै, बाढीमा परी बेपत्ता हुने चिनियाँ नागरिकमा यु युई, लि ह्वासिङ, याङ छुआन, हैहाङ, यु छिआउ क्यु र जोउ योङ छन् । बाढीमा फसेका ५५ जनाको उद्धार गरिएको पनि प्रशासन कार्यालयले जानकारी दिएको छ । तीमध्ये ५० नेपाली, एक चिनियाँ र चार जना भारतीय छन् । 

उत्तरगया गाउँपालिका–५, स्थित खोला किनारामा एक पुरुषको दाहिने खुट्टा भेटिएको प्रशासनको भनाइ छ । कार्यालयका अनुसार बाढीले नेपाल–चीन जोड्ने मितेरी पुल बगाउँदा सडक सम्पर्क पूर्ण रुपमा टुटेको छ । योसँगै स्याफ्रवेशी–रसुवागढी सडकमा क्षति पुगी पूर्ण रुपमा अवरुद्ध भएको छ । 

यसैगरी, रसुवा भन्सार कार्यालयको यार्ड तथा ईभी चार्जिङ स्टेशनमा क्षति पुगेको, टिमुरेको यार्ड–सुख्खा बन्दरगाहमा भन्सार जाँच पासका लागि राखिएका केही थान मालवाहक ट्रक, कन्टेनर र विद्युतीय गाडी बगाएको पनि सिडियो कार्यालयले बताएको छ ।