कुलमानलाई प्रश्न सोध्दा जसको माइक खोसियो..

सुशीला कार्की नेतृत्वको सरकारमा तीन वटा विकासे मन्त्रालयको जिम्मेवारी सम्हालिरहेका कुलमान घिसिङ्गलाई प्रश्न सोध्दा माइक खोसिएपछि एक इञ्जिनियरले चित्त दुखाएका छन् । आन्दोलनको जगबाट बनेको सरकारमा पनि प्रश्न सोध्दा खप्की खानुपर्ने भन्दै उनले आपत्ति जनाएका छन् । 

हिजो राजधानीमा ‘नेपाल इञ्जिनियर्स एशोसिएशन’ को कार्यक्रम आयोजना गरिएको थियो । प्रमुख अतिथि थिए- घिसिङ्ग । इञ्जिनियर र इञ्जिनियरिङ पढिरहेका विद्यार्थीहरु कार्यक्रममा उपस्थित थिए । सिभिल इञ्जिनियर अन्तिम प्रसिद्ध धिताल कार्यक्रममा अलि ढिलो पुगे । जसका कारण अन्तिमतिर प्रश्न राख्ने मौका पाए । 

आयोजकले उक्त कार्यक्रममा एउटा अनौठो नियम बनाएका थिए– प्रमुख अतिथिलाई राजनीतिक प्रश्न गर्न नपाइने । हालै राष्ट्रिय स्वतन्त्र पार्टी (रास्वपा) प्रवेश गरेका घिसिङ्गलाई राजनीतिक प्रश्न गर्न नपाउने नियमका कारण धेरै आश्चर्यचकित भएका थिए । 

‘तपाईं नागरिक जगमा बनेको सरकारको मन्त्री हो वा रास्वपाको मन्त्री हो ? प्रश्न एक यो छ’,धितालले बोल्दाबोल्दै उद्घोषकले माइक खोसेर भन्न थाले,‘यहाँ राजनीतिक प्रश्न गर्न नपाउने नियम छ,त्यस्तो प्रश्न नसोध्नु होला ।’ तैपनि उनी रोकिएनन् र पुनः प्रश्न गरे । त्यसपछि एक युवकले उनको हातबाट माइक खोसिदिए ।

देशमा प्रश्न उठाएर राजनीति गर्नेहरू, नैतिकताको पाठ पढाएर मन्त्री बन्नेहरू, आन्दोलनको जगमा बनेको सरकारका प्रतिनिधिहरू-उनीहरू स्वयं नैतिक हुन नपर्ने ? कुनै न कुनै पार्टीको झण्डामुनि उभिएर “नैतिकता” देखाउने यो कस्तो प्रदर्शन हो ?’ 

यता,घिसिङ्गले भने जवाफ दिने औपचारिकता मात्र पूरा गरे । उनले भने,‘म आजका दिनसम्म कुनै पनि पार्टीको सदस्य छैन,त्यति मात्रै भन्छु ।’ आफ्नो माइक खोसिएपछि धितालले सामाजिक सञ्जालमा स्ट्याट्स लेख्दै असन्तुष्टि पोखेका छन् । प्रश्न गर्न नपाइने,सत्य सुन्न नचाहने र जवाफदेही हुन नपर्ने संस्कारबाट कसरी देश बन्छ ? भन्दै उनले प्रश्न गरेका छन् । 

उनले लेखेका छन्,‘मेरो प्रश्न कुनै व्यक्ति लक्षित थिएन । देश नै समस्याग्रस्त भएको अवस्थामा इन्जिनियरिङ पेशा कसरी अछुतो रहन सक्छ ? देशमा प्रश्न उठाएर राजनीति गर्नेहरू, नैतिकताको पाठ पढाएर मन्त्री बन्नेहरू, आन्दोलनको जगमा बनेको सरकारका प्रतिनिधिहरू—उनीहरू स्वयं नैतिक हुन नपर्ने ? कुनै न कुनै पार्टीको झण्डामूनि उभिएर “नैतिकता” देखाउने यो कस्तो प्रदर्शन हो ?’