ध्वंसात्मक आन्दोलनको असर सेयर बजारमा

जेन जीको नाममा भएको ध्वंसात्मक आन्दोलनका कारण आज खुलेको सेयर बजारमा ठूलो गिरावट आएको छ। नेप्से परिसूचक १६० अंकले घटेर २,५११.९१ बिन्दुमा पुगेको छ । यो करिब ६ प्रतिशतको ह्रास हो । बजारमा अस्वाभाविक उतारचढाव भएपछि आजको सेयर कारोबार बन्द गरिएको छ।

नौ दिनपछि बजार खुलेको पहिलो दुई मिनेटमै नेप्से ४ प्रतिशतले घटेपछि २० मीनेटका लागि सर्किट ब्रेकरमार्फत कारोबार रोकिन पुगेको थियो। त्यसपछि ११ बजेर २२ मिनेटमा बजार खुल्दा पहिलो मिनेटमै नेप्से ५ प्रतिशतले घट्यो र दोस्रो सर्किट ब्रेकरमार्फत ४० मीनेटका लागि कारोबार रोकियो। फेरि नेप्से ६ प्रतिशतले घटेपछि १२ बजेर ६ मीनेटमा तेस्रो सर्किट ब्रेकरमार्फत् आजको कारोबार पूर्णरूपले बन्द गरिएको छ ।

नेपाल स्टक एक्सचेन्जले २०६४ सालदेखि सर्किट ब्रेकरको व्यवस्था गरेको हो । दैनिक सेयर बजार र कम्पनीको सेयर मूल्यमा १० प्रतिशतको उतारचढाव भएमा सर्किट ब्रेकरमार्फत नियन्त्रण गर्ने व्यवस्था छ ।