कोशीमा बगेका सशस्त्रका दुई जवानमध्ये एकको शव फेला

कोशी नदीमा हिजो बगेका सशस्त्र प्रहरी बलका दुई जनामध्ये एक जना जवानको शव फेला परेको छ । सप्तरीतर्फको किनारमा स्थानीय माछा मारिरहेका व्यक्तिले शव देखेपछि सशस्त्रलाई खबर गरेका हुन् । हिजो बगेकामध्ये सशस्त्र प्रहरी जवान हरदे राजवंशीको शव भेटिएको हो ।

मनसुनजन्य विपद्को पूर्वतयारीका लागि तालिमरत दुई सशस्त्र प्रहरी जवान हिजो कोशी नदीमा बेपत्ता भएका हुन् । सशस्त्रको नम्बर १ गण इलाममा दरबन्दी भई सप्तरीस्थित दन्तकाली विशेष कार्य तालिम शिक्षालयमा कार्यरत जवान हरिदेव राजवंशी र नम्बर १३ गण पर्सामा दरबन्दी भई नम्बर २ गण छिन्नमस्ता बाहिनी मुख्यालयमा कार्यरत सुरज साउद बेपत्ता भएका थिए ।

मधेश प्रदेश सरकारको गृह,सञ्चार तथा कानुन मन्त्रालयले भोलिदेखि ‘मनसुनजन्य विपद्को पूर्वतयारीस्वरुप प्रदेशस्तरीय विपद् सेमुलेसन अभ्यास’ कार्यक्रमको आयोजना गर्दैछ ।

त्यसका लागि सप्तरीको हनुमाननगर कंकालिनी नगरपालिका १ मा रहेको नम्बर ६ गणका गणपति उपरीक्षक ज्ञानमणि पौडेलको कमाण्डमा १७ जना, दन्तकाली विशेष कार्य तालिम शिक्षालयबाट प्रहरी नायव उपरीक्षक गणेश दाहालको कमाण्डमा २३ जना र नम्बर ७ गणबाट प्रहरी सहायक निरीक्षक सोमदेव यादवको कमाण्डमा १६ गरी ५६ जनाले संयुक्त अभ्यास गरिरहेका थिए । सोही क्रममा उनीहरु कोशीमा बगेका हुन् ।