परराष्ट्रमन्त्री उतै हुँदा नेपालवारे नराम्रो खबर भाइरल

परराष्ट्रमन्त्री डा. आरजू राणा देउवा टोक्योमा रहेकै बखत जापान डेलीमा नेपालको खराब आर्थिक अवस्थाबारे समाचार प्रकाशित भएको छ । आगामी शनिबार आयोजना गर्न लागिएको नेपालको राष्ट्रिय दिवससम्बन्धी कार्यक्रम एकाएक रध्द गरिएको छ । 

आर्थिक अभाव देखाउँदै ओसाका एक्सपो २०२५ मा आयोजना गर्न लागिएको गणतन्त्र दिवस तथा राष्ट्रिय दिवस कार्यक्रम रोकिएको जापान डेलीले प्रकाशित गरेको छ । आर्थिक अभावका कारण बेलैमा कार्यक्रमस्थल बनाउन नसकिएकाले कार्यक्रम रोकिएको हो ।

टोक्योस्थित नेपाली दूतावासको लाचारी र गैरजिम्मेवारपूर्ण कार्यबाट एक्सपो आयोजक, कार्यक्रमस्थल तयारीमा जुटेका संघ संस्थाहरु निराश बनेको समाचारमा उल्लेख छ । उनीहरुले नेपालले नयाँ उपाय अवलम्बन गरेर भएपनि आफ्नो राष्ट्रिय दिवससँग जोडिएको कार्यक्रम सम्पन्न गर्ने विश्वास जापानीहरुले लिएका छन् ।

मन्त्री राणा ज्येष्ठ नागरिकहरुमा हुने सामाजिक एकान्तसम्बन्धी अन्तर्राष्ट्रिय सम्मेलनमा भाग लिएर आज स्वदेश फर्कंदै हुनुहुन्छ । उहाँ जापानमा रहेकै बखत यस्तो समाचार प्रकाशित भएको हो ।