हिजो गंगटा खाएका माओवादी नेता आज शोभा तालमा

पार्टी बलियो बनाउन देश दौडाहामा रहनुभएका नेकपा (माओवादी केन्द्र)का अध्यक्ष पुष्पकमल दाहाल प्रचण्ड कञ्चनपुर पुग्नुभएको छ । हुलाकी राजमार्ग केन्द्रित जागरण अभियानका क्रममा कैलाली हुँदै हिजो साँझ कञ्चनपुर छिर्नुभएका उहाँले आज बिहान शोभा तालको अवलोकन गर्नुभएको छ । 

पुनर्वास नगरपालिका-५ स्थित उक्त ताल हेर्न जानुअघि  प्रचण्डसहित माओवादी नेताहरुले मतियाबस्ती पुगेर शहीद तथा वेपत्ता परिवारसँगै बसेर चिया पिउनुभएको थियो । सोक्रममा ‘एक शहीद, एक रोजगार’ कार्यक्रम शुरु गर्न लागिएको जानकारी गराइयो । 

‘शहीदहरुकै बलिदानबाट यो व्यवस्था जन्मिएको हो, त्यसकारण ज्यान गुमाउने योद्धाहरुप्रति हामी सबैभन्दा जिम्मेवार छौ’, प्रचण्डले भन्नुभयो, ‘प्रत्येक शहीद, वेपत्ता र घाइते परिवारमा एक जनालाई रोजगारी प्रदान गर्नेगरी नयाँ कार्यक्रम तय गर्दैछौ ।’

प्रचण्डसहितका माओवादी नेताहरु गएराति सहिद परिवारकै घरमा बास बस्नुभएको थियो । साँझ भोजनमा स्थानीयले गँगटा र बयरको चटनी, घोँघी, लोकल कुखुराको मासुलगायतका परिकार खुवाएका थिए । सरकारमा हुँदासम्म शहीद तथा वेपत्ता परिवारलाई वास्ता नगरेको आरोपका बीच पछिल्लो समय भने माओवादी नेताहरु यो मामिलामा बदलिन खोजेको देखिन्छ ।

अभियान टोलीमा वरिष्ठ उपाध्यक्ष नारायणकाजी श्रेष्ठ, उपाध्यक्ष नन्दकिशोर पुन, अग्निप्रसाद सापकोटा, पम्फा भुसाल, महासचिव देवप्रसाद गुरुङलगायत केन्द्रीय कार्यालयका सदस्यहरु सहभागी छन् । गत फागुन १२ गते देशकै सबैभन्दा होचो भूभाग झापाको केचनकबलबाट शुरु भएको जागरण अभियान आज महेन्द्रनगरमा कार्यक्रम गरी समापन गरिँदैछ । 

गत वर्ष प्रचण्ड  नेतृत्वको  सरकारलाई विस्थापित गर्दै कांग्रेस र एमाले सत्तामा पुगेपछि एकाएक 'जनतामा फर्किएको' माओवादीले अब गण्डक यात्रा पनि गर्दैछ ।