होटलको रिबन काट्न प्रधानमन्त्री हौसिँदै
निजी क्षेत्रका होटल उद्धघाटनमा अतिरिक्त रुचि देखाउँदै आउनुभएका प्रधानमन्त्री केपी शर्मा ओलीले आज अर्को एउटा होटलको रिबन काट्ने कार्यक्रम तय भएको छ । उहाँले दिउँसो दाङको तुल्सीपुरस्थित एक होटल उद्धघाटन गर्न लाग्नुभएको हो ।
प्रधानमन्त्री ओली लुम्बिनी प्रदेश सभा अधिवेशनलाई सम्बोधन गर्न दाङ जाँदै हुनुहुन्छ । यही मौकामा उहाँको हातबाट होटलको शुभारम्भ गराउने चाँजो मिलाइएको हो । योसँगै सरकारको आठ महिने कार्यकालमा प्रधानमन्त्री ओलीको हातबाट उद्धघाटन भएका होटलको संख्या पाँच पुग्नेछ ।
गत माघ २ गते उहाँले सुकेधारास्थित मर्क्युर होटलको उद्धघाटन गर्नुभएको थियो । तीन अर्ब लगानीमा एबी होल्डिङ्सले निर्माण गरेको उक्त होटलको ब्राण्ड इटालियन स्वादको लागि अन्तर्राष्ट्रिय बजारमा चर्चित छ ।
त्यसअघि असोज २३ गते उहाँले आफ्नै क्याबिनेट मन्त्री दिपक खड्काको लगानीमा खुलेको पाँचतारे होटल शुभारम्भ गर्नुभएको थियो । बूढानीलकण्ठ नगरपालिका–१ मुहानपोखरीमा रहेको होटल ‘होलिडे इन’ को एक भव्य समारोहबीच खड्काले ओली र काँग्रेस सभापति शेरबहादुर देउवाको हातबाट रिबन कटाएका थिए ।
त्योभन्दा अघि प्रधानमन्त्री ओलीले विवादित व्यक्तिको लगानीमा खुलेका अरु दुई वटा होटल आफ्नै हातले उद्धघाटन गर्नुभएको थियो । भदौ २९ गते बूढानीलकण्ठस्थित होटल लेमन ट्री प्रिमियरको शुभारम्भ गराइएको थियो । शेयर बजारका नामुद खेलाडीहरु यसको मुख्य लगानीकर्ता हुन् ।
त्यस्तै, प्रधानमन्त्री नियुक्त भएको केही दिनमै उहाँले नक्सालस्थित होटल हिल्टनको उद्धघाटन गर्नुभएको थियो । कोरोना महामारीमा ‘थर्मल गन’ काण्ड मच्चाएका र विभिन्न विवादमा मुछिएका शंकर ग्रुपका साहिल अग्रवाल हिल्टन होटलका मालिक हुन् ।
टिप्पणीहरू