बंगलादेशबाट फर्किएकामध्ये सबैभन्दा धेरै विद्यार्थी काकडभिट्टा नाका हुँदै
सरकारी जागिरको आरक्षणमा गरिएको विशेष व्यवस्थाविरुद्ध जारी आन्दोलन चर्किएपछि बंगलादेशबाट नेपाली विद्यार्थी धमाधम फर्किन थालेका छन् । हालसम्म एक हजार एक सय ३० जना विद्यार्थी नेपाल फर्किएको बताइएको छ ।
तीमध्ये पूर्वी नाका काँकडभिट्टा हुँदै मात्र आज बिहानसम्म सात सय ७५ जना विद्यार्थी स्वदेश आइपुगेका छन् । ढाकाबाट हवाईमार्ग हुँदै तीन सय ४१ जना विद्यार्थी काठमाडौंस्थित त्रिभुवन अन्तर्राष्ट्रिय विमानस्थलमा ओर्लिएका छन् ।
१४ जना विद्यार्थी बिराटनगरस्थित रंगेली नाकाबाट नेपाल फर्किएका हुन् । प्राप्त विवरणअनुसार आन्दोलनपछि साउन १ गते पहिलो पटक विभिन्न नाका तथा हवाईमार्ग हुँदै १८ जना नेपाली विद्यार्थी बंगलादेशबाट स्वदेश आएका थिए ।
साउन २ गते ४७ जना, साउन ३ गते एक सय ६० जना, साउन ४ गते एक सय ८७ जना, साउन ५ गते दुई सय १२ जना र हिजो साउन ६ गते चार सय १२ जना फर्किएका हुन् ।
आज बिहानसम्म बंगलदेशबाट थप ९४ जना नेपाली विद्यार्थी स्वदेश आइपुगेका छन् । त्यहाँका विभिन्न शैक्षिक संस्थामा करिब पाँच हजारभन्दा बढी नेपाली विद्यार्थी अध्ययनरत छन् ।
आन्दोलन हिंसात्मक हुन थालेपछि विगत सात दिनदेखि नेपाली विद्यार्थीहरु स्वदेश फर्किने क्रम जारी छ । सन् १९७१ मा पाकिस्तानबाट छुट्टिएर बंगलादेश स्वतन्त्र हुँदा लडेका बंगलादेशी सेनाका सन्तानलाई सरकारी जागिरमा विशेष आरक्षण दिने सरकारको नीतिविरुद्ध उनीहरुले आन्दोलन चर्काएका हुन् ।
विद्यार्थी र सुरक्षाकर्मीबीचको झडपमा सयौंको ज्यान गएको छ । आन्दोलनले हिंसात्मक रुप लिएपछि बंगलादेशको सर्वोच्च अदालतले आरक्षण प्रणाली खारेजको आदेश दिएको छ ।
टिप्पणीहरू