पूर्वगृहसचिव पाण्डेलाई अदालतमा उभ्याइयो

सर्वसाधारणलाई नक्कली शरणार्थी बनाएर करोडौं कुम्ल्याउने आपराधिक गिरोहमा संलग्न रहेको आरोपमा पक्राउ परेका उपराष्ट्रपति कार्यालयका सचिव टेकनारायण पाण्डेलाई म्याद थपका लागि जिल्ला अदालत काठमाडौं लगिएको छ ।

नेपाली नागरिकलाई भुटानी शरणार्थी बनाएर अमेरिका लैजाने भन्दै ठगी गरेको आरोपमा आज पक्राउ परेका उनलाई थुनामा राखेर अनुसन्धानको निम्ति म्याद थपको अनुमति लिन अदालत पुर्याइएको हो । पाण्डेमाथि अनुसन्धानका लागि १० दिन थुनामा राख्ने अनुमति मागिएको काठमाडौँ प्रहरीले जनाएको छ । 

हाल उपराष्ट्रपति कार्यालयमा रहेका पाण्डे गृहसचिव हुँदा यो प्रकरणमा सामेल भएको आरोप छ । यसअघि पक्राउ परेका अन्य व्यक्तिले पाण्डेको पनि संलग्नता रहेको बयान दिएपछि प्रहरीले उनलाई पक्रेको हो । 

उक्त प्रकरणमा नेकपा एमालेका सचिव टोपबहादुर रायमाझी, उनका छोरा सन्दीप र एमाले उपाध्यक्ष तथा त्यतिबेलाका गृहमन्त्री रामबहादुर थापा बादलका छोरा प्रतिकविरुद्ध पनि आज पक्राउ पुर्जी जारी भएको छ ।