ई–पासपोर्टको बायोमेट्रिक डाटा संकलन गर्न नेपाली टोली पोर्चुगल जाने

विद्युतीय राहदानी (ई–पासपोर्ट) को तथ्याङ्क संकलन गर्न राहदानी विभागको टोली पोर्चुगलको लिस्वन जाने भएको छ । चैत १५ गते विभागको टोली त्यता जान लागेको बताइएको छ ।

लिस्वनस्थित नेपाली महावाणिज्यदूतावासको समन्वयमा नेपालबाट गएको टोलीले ई–पासपोर्टको बायोमेट्रिक डाटा संकलन गर्ने फ्रान्सस्थित नेपाली राजदूतावासले जनाएको छ । दूतावासका पदाधिकारीहरुले समेत राहदानी सेवा प्रदान गर्न सहयोग गर्ने जनाइएको छ । 

दूतावासले लाइभ इनरोलमेण्टको निम्ति अनलाइन अपोइण्टमेण्ट लिइसकेका आवेदकहरुको मात्र बायोमेट्रिक लिने स्पष्ट पारेको छ । अनलाइनमार्फत फाराम भरेकाहरुले दरखास्त बारकोड र क्युआर कोर्डसहितको फाराम प्रिन्टको एक प्रति, नेपाली नागरिकको प्रमाणपत्रको सक्कल र सोको फोटोकपी, नाबालिगको हकमा जिल्ला वा इलाका प्रशासन कार्यालयबाट जारी भएको नाबालिग प्रमाणपत्र र बुबाआमाको नागरिकताको प्रमाणपत्र संकलन केन्द्रमा बुझाउनुपर्नेछ । 

त्यस्तै, पूरानो राहदानीको सक्कल र फोटोकपी, राहदानी हराएको भए प्रहरी प्रतिवेदनको एकप्रति, पोर्चुगलमा रहेको प्रमाण जनाउने कागजात पनि पेश गर्नुपर्नेछ । पोर्चुगलमा जन्मिएका नाबालकहरुलाई अस्थायी नम्बरको व्यवस्था गरिएको छ । नाबालक–नाबालिकाको परिचयपत्र नहुने भएकाले जन्मदर्तालाई आधार मानेर दूतावासले दर्ता किताब खडा गरि अस्थायी दर्ता नम्बर दिने जनाएको छ ।   

दूतावासकाअनुसार अपोइण्टमेण्ट दिइसकेका राहदानीको म्याद भुक्तान वा राहदानी क्षति भएका निवेदकहरुले मार्च २९, ३०, ३१ र अप्रिल २ गते प्रमाण पेश गर्नुपर्नेछ । राहदानी हराएकाले अप्रिल ३,७,९,१४,१६ र १८ र म्याद भुक्तान भएका राहदानीवाहकहरुले अप्रिल २०, २१ र २३ गते सेवा पाउने छन् । 

राहदानी नष्ट भएका र पोर्चुगलमा जन्मिएका नाबालिगहरुलाई अप्रिल २४ र २५ तारिखका दिन सेवा दिने दूतावासले जनाएको छ ।