कपोलकल्पित समाचारप्रति माधव नेपालको आपत्ति

जेन–जी विध्वंशका क्रममा नेकपा एकीकृत समाजवादीका अध्यक्ष माधवकुमार नेपाल भारतीय दूतावासमा शरण लिन पुगेको भन्ने समाचारप्रति उहाँको निजी सचिवालयले आपत्ति जनाएको छ । सचिवालयले आधारहीन समाचारको खण्डन गर्दै डिसी नेपालमा प्रकाशित समाचारमा कुनै सत्यता नरहेको बताएको छ ।

भदौ २४ गते जेन जी ध्वंशमा अध्यक्ष नेपाल बिहान ९ बजे सिंहदरबारमा आयोजित विपक्षी दलहरुको बैठकमा सहभागी भएको,दिनभर आफ्नै संसदीय दलमा बसेको र सिंहदरबारमा तोडफोड र आगजनी हुन थालेपछि सिंहदरबारभित्रै नेपाली सेनाको गणमा गएको सचिवालयले जनाएको छ । त्यतिबेला नेपालसँगै पार्टीका प्रमुख सचेतक मेटमणि चौधरी, उहाँका निजी सहयोगी लक्ष्मण रेग्मी,जसपा नेपालका नेता महेन्द्रराय यादवलगायत पनि थिए । 

सचिवालयले उक्त भ्रमित समाचारप्रति क्षमायाचना गर्न र भविष्यमा यस्ता गलत समाचार प्रकाशन नगर्न डिसी नेपाललाई चेतावनीपूर्ण भाषामा ध्यानाकर्षण गराएको छ । उक्त अनलाइनले जेन जी ध्वंसको क्रममा अध्यक्ष नेपाल लैनचौरस्थित भारतीय दूतावास पुगेको समाचार प्रकाशित गरेको थियो । 

सचिवालयका अनुसार अध्यक्ष नेपाल भोलिपल्ट २५ गते बिहानैदेखि निरन्तर पार्टी कार्यकर्ताको घरमा बसेको तथ्ययुक्त समाचार अन्य अनलाइन सञ्चारमाध्यमले प्रकाशित गरेका थिए । भनिएको छ, ‘डिसी नेपालमा प्रकाशित बदनियतपूर्ण एवम कपोलकल्पित समाचारको खण्डन गर्दछौं ।’