मल अभाव अन्त्य गर्न फेरि छलफल गर्ने सहमति
कृषि तथा पशुपंक्षी विकासमन्त्री रामनाथ अधिकारीले मलखादको समस्या सधैँका लागि समाधान गर्नेतर्फ सरकार अघि बढिरहेको दाबी गरेका छन् ।
प्रधानमन्त्रीसँग रासयनिक मलको अभावबारे भएको छलफलपछि उनको यस्तो भनाइ आएको हो । रासयनिक मलको अभाव अन्त्य गर्नेबारे प्रधानमन्त्री केपी ओलीसँग कुराकानी भएको तर निष्कर्ष निकाल्न नसकेको मन्त्री अधिकारीले जानकारी दिए ।
आगामी शुक्रबार पुन: बस्ने सहमतिका साथ बैठकबाट बाहिरिएको उनले बताए । मलको समस्या कुन ढंगबाट सधैँका लागि समाधान गर्ने भन्ने बारेमा प्रधानमन्त्रीले चासो राखेको उनको भनाइ छ ।
‘रासयनिक मलका सन्दर्भमा छलफल भयो । छलफलको निष्कर्ष आज निस्किन सकेन । हामी तीन दिनमा फेरि बस्ने शुक्रवार बस्ने भन्ने सहमतिका साथ बाहिरिएका छौँ । तीन दिनपछि बसौँ र एउटा निष्कर्षमा पुगौँ भन्नुभयो’, मन्त्रीले भने, ‘मलमा जुन समस्या आएका छन्, ठूलो समस्या त छैनन् तर कुन ढंगबाट सधैँका लागि समाधान गर्ने भन्ने विषयमा छलफल भयो । फर्टिलाइजरका विषयमा आगामी दिनमा समस्या नआउने गरी निष्कर्षमा पुग्दैछौँ ।’
टिप्पणीहरू