प्रधानमन्त्रीले पानी दिने प्रतिवद्धता गरेको उपेन्द्रको दाबी

जनता समाजवादी पार्टी (जसपा) नेपालका अध्यक्ष उपेन्द्र यादवले मधेसमा विद्यमान खानेपानी समस्या समाधानका लागि प्रधानमन्त्रीसँग कुरा राखेको बताएका छन् । 

बारा, पर्सा लगायतका जिल्लामा तीव्र हुँदै गएको पानी अभावको विषय आफूले उठाएको र प्रधानमन्त्री केपी शर्मा ओली समस्या समाधानका लागि तयार रहेको उनले फेसबुकबाट जानकारी गराए । 

सरकारलाई दिएको समर्थन फिर्ता लिने घोषणा गरेको एक सातापछि यादव हिजो सत्ता गठबन्धनको बैठकमा सहभागी भएका थिए । त्यहिक्रममा आफूले पानीको समास्या समाधानका लागि कुरा उठाएको उनले दाबी गरेका हुन् । 

बैठकमा भएका कुरा उल्लेख गर्दै यादवले फेसबुकमा लेखेका छन्, 'आज प्रधानमन्त्री निवासमा केही महत्वपूर्ण राजनीतिक विषयमा छलफल भयो । म आफूले बारा र पर्साजस्ता जिल्लामा खानेपानीको चरम अभाव रहेको कुरा बैठकमा उठाएँ ।' 

उनका अनुसार प्रधानमन्त्री ओलीले उक्त विषयलाई गम्भीरताका साथ लिँदै तुरुन्तै आवश्यक पहल गर्ने आश्वासन दिएका छन् । 'प्रधानमन्त्रीले भोलीदेखि नै डिप बोरिङ्गलगायत अन्य आवश्यक प्रक्रिया अगाडि बढाएर ती जिल्लाहरूमा पानीको व्यवस्था गर्ने प्रतिवद्धता जनाउनुभयो', यादवले भने ।