संसद छोडी रास्वपा सांसदहरु धमाधम विदेशतिर

भिजिट भीसा प्रकरणमा गृहमन्त्री रमेश लेखकमाथि छानबिनको माग गर्दै प्रतिनिधि सभाको बैठक अवरुद्ध गरिरहेको राष्ट्रिय स्वतन्त्र पार्टी (रास्वपा) को मेहिनेत खेर जाने देखिएको छ ।

कहिले निलो दोसल्ला ओढेर त कहिले माथिदेखि तलसम्म कालो पहिरन भिरेर सदन बहिष्कार गरिरहेका रास्वपाका अधिकांश सांसद विदेश भ्रमणमा लागेपछि मिसन तुहिने भएको हाे । 

यतिबेला रास्वपाका पाँच जना विदेश भ्रमणमा छन् । सांसद सोविता गौतम र हरि ढकाल भारतको बैंग्लोरमा छन् । काठमाडौंबाट नयाँ दिल्ली हुँदै उनीहरु हिजो त्यता गएका हुन् । अर्की सांसद तोसिमा कार्की अमेरिका गएको लामो समय भइसकेको छ । उनको केही दिनअगाडि टेक्सासको प्रमुख शहर डल्लासमा घुमफिर गरिरहेको तस्बिर सार्वजनिक भएको थियो । 

उता, सांसद गणेश पराजुली अष्ट्रेलिया पुगेका छन् भने पार्टीका वर्तमान कमाण्डर अर्थात कार्यवाहक सभापति डिपी अर्याल हिजो कतार प्रस्थान गरेका छन् । एकपछि अर्को सांसद विदेश लागेपछि संसद्मा रास्वपा कमजोर देखिएको छ । रास्वपाको अवरोधका बीच सभामुख देवराज घिमिरेले संसद् सुचारु गरेका छन् । आफ्नै सांसदका कारण सभामुख घिमिरेले संसद्मा पेलेको रास्वपाका कतिपय नेताको ठम्याई छ । 

पार्टीका एक केन्द्रीय सदस्यले भने,‘संसद् अवरोध निर्णायक मोडमा पुगेको छ । सडकमा जाने अवस्था पनि आउन सक्छ । तर, सांसदहरु आफ्नो विदेश मोह छोड्नै सक्दैनन् । संसद् अवरोध चलिरहँदा विदेश हिँडेकैले सभामुखले पेलेका हुन् । संसद्मा प्रस्तुति एकदमै कमजोर भएको छ ।’ सदन बहिष्कार गरिरहेका सांसदहरुले पनि उनीहरु विदेश भ्रमणमा गएपछि असन्तुष्टि जनाएको बुझिएको छ । 

आफूहरु दोर्हाइतेर्हाइ विदेश गइरहेको र अरुलाई मौका नै नदिएकोमा उनीहरु रुष्ट छन् । स्रोतका अनुसार उनीहरु पार्टीको काम भनेर घुमफिर र भेटघाटका लागि त्यता गएका हुन् । ‘कार्यक्रमको बहाना बनाएर उनीहरु घुमफिर गर्न गएका हुन् । आफ्ना निकटस्थले कार्यक्रम बनाउँछन् अनि बोलाउँछन् । सबै छोडेर हतारहतार विदेश पुगिहाल्छन् । यतिबेला पार्टी भद्रगोल छ, जिल्ला–जिल्लामा गएर अभियान चलाउनुपर्नेमा विदेश गएका छन्’,स्रोतले भन्यो ।