भोटेकोशी र सुनकोशीमा बाढीको जोखिम, सतर्कता अपनाउन आग्रह

चीनको तिब्बत क्षेत्रमा अत्यधिक वर्षाको सम्भावना रहेको भन्दै सिन्धुपाल्चोकको भोटेकोशी र सुनकोशी नदी आसपास बसोबास गर्नेहरुलाई सचेत गराइएको छ ।

स्थानीय प्रशासनले आज सार्वजनिक सूचना निकालेर भोटेकोशी र सुनकोशी नदी आसपास क्षेत्रमा बस्नेहरुलाई विशेष सतर्कता अपनाउन भनेको हो । प्रशासनका अनुसार तिब्बत क्षेत्रमा असार ३ गतेदेखि ७ गतेसम्म अत्यधिक वर्षा हुने सम्भावना रहेकाले भोटेकोशी नदीको बहाव बढ्नसक्ने भन्दै चिनियाँ पक्षले पत्र पठाएको छ ।

सूचनामा भनिएको छ, ‘चीनको प्रहरी कार्यालयबाट उक्त सूचना प्राप्त भएकोले भोटेकोशी र सुनकोशी नदी आसपास (भोटेकोशी गाउँपालिका, बाह्रबिसे नगरपालिका, त्रिपुरासुन्दरी गाउँपालिका, सुनकोशी गाउँपालिका, बलेफी गाउँपालिका र चौतारा साँगाचोकगढी नगरपालिकाको भोटेकोशी–सुनकोशी नदी आसपास) क्षेत्रमा जोखिम हुनसक्ने भएकोले नदी आसपास क्षेत्रमा बसोबास गर्नुहुने महानुभावहरुमा सतर्कता अपनाउन अनुरोध छ ।’