गणतन्त्र दिवसमा हर्क साम्पाङको भेलासँगै राजावादीहरुको आन्दोलन

२०७९ को निर्वाचनमा स्वतन्त्र उम्मेदवारको रुपमा धरान उपमहानगरपालिकाको मेयर निर्वाचित भएका हर्क साम्पाङले नयाँ राजनीतिक दल खोल्ने गृहकार्य थालेका छन्  । उनले आगामी जेठ १५ गते झापाको दमकमा समर्थकहरुको भेला आह्वान गरेका हुन् । 

भेलाले औपचारिक समिति घोषणा गरेपछि देशभर अभियान चलाउने बताइएको छ । सोही समितिलाई केही समयपछि राजनीतिक दलको कमिटीको रुपमा परिणत गर्ने साम्पाङको तयारी छ । 

मेयर साम्पाङले आगामी निर्वाचनमा भ्रष्ट र दलालहरुलाई डाँडा कटाउनको लागि आफूलाई साथ दिन अपिलसमेत गरेका छन् । ‘अब दमकमा हुनेछ देश बनाउने टिम गठन’, उनले भनेका छन्, ‘म दिन्छु भिजन, योजना र नेतृत्व ! अरुले सक्दैनन्, जान्दैनन् र चाहँदैनन् !’

मेयर साम्पाङले गफाडीहरुलाई भने आफ्नो समूहमा निषेध गरेका छन् । ‘व्यापक रुपमा संगठन निर्माण र बिस्तार गरौँ, गफाडीहरुको पछि होइन, काम गर्नेहरुको पछि लाग्न अनुरोध !’, उनले थपेका छन् । 

यता राजधानीमा सोही दिनदेखि राजावादीहरुले अनिश्चितकालीन आन्दोलनको घोषणा गर्दै छन् । त्यसको पूर्वतयारीमा भोलि भद्रकाली पीठमा तान्त्रिक अनुष्ठानसमेत आयोजना गरिँदै छ । राजावादीहरुको आन्दोलनलाई लक्षित गरेर प्रहरी हेडक्वार्टरले पनि उपत्यकाको कमाण्ड सम्हालेका इञ्चार्ज र सहइञ्चार्जहरुलाई बलियो सुरक्षा रणनीति बनाउन निर्देशन दिएको छ ।