एमाले केन्द्रीय कार्यालय निर्माण बल्खुमै गर्न अझै विन्दाको जोड

नेकपा (एमाले) की निलम्बित नेत्री विन्दा पाण्डेले पार्टी केन्द्रीय कार्यालय मदननगर, बल्खुमा नै बनाउनुपर्ने बताएकी छन् । आफ्नो गैरआख्यानात्मक कृति ‘भुइँमान्छेः आश्रय,सुरक्षा र सम्पर्कका सारथि’ माथि चर्चा गर्न गृहजिल्ला नुवाकोटमा आयोजित कार्यक्रममा उनले उक्त धारणा राखेकी हुन् । 

अध्यक्ष केपी शर्मा ओलीले नै शिलान्यास गरेको र भवन निर्माणका लागि हालसम्म १० करोड आर्थिक सहयोग–चन्दा उठाइएको जनाउँदै उनले नेता–कार्यकर्ताको भावना र स्वाभिमान जोडिएकाले सोही ठाउँमा भवन बनाउन आफूले अध्यक्ष ओलीलाई अनुरोध गरेको स्पष्ट पारिन् । 

मदन आश्रित स्मृति दिवसको पूर्वसन्ध्यामा नेपाल बुद्धिजीवी परिषद्, नुवाकोटले हिजो आयोजना गरेको कार्यक्रममा उनले भनिन्, ‘नयाँ वर्षको शुभकामना आदानप्रदान गर्न गत वैशाख २ गते म अध्यक्षकहाँ गएकी थिएँ, त्यहाँ आफ्नो कुरा राखेँ । हामीले पार्टी कार्यालय जाँदा ठाडो शिरले छिर्न पाउनुपर्छ । नेता–कार्यकर्ताबाट उठाइएको एक एक सय रुपैयाँबाट नै सानो घर भए पनि बनाउनुपर्छ । त्यसपछि उहाँले अलि अलि मात्र टाउको हल्लाउनुभयो ।’

उनले पार्टी जीवनमा पुरस्कार, निष्कासन,निलम्बन स्वाभाविक भएको जनाउँदै तत्कालीन नेकपा (माले) कालमा गोपाल शाक्यले राखेको विमति पनि पछि पार्टीले स्विकारेको र अहिले उनी तुलसीलाल प्रतिष्ठानको अध्यक्ष भएकोसमेत बताइन् ।

‘नयाँ वर्षको शुभकामना आदानप्रदान गर्न गत वैशाख २ गते म अध्यक्षकहाँ गएकी थिएँ, त्यहाँ आफ्नो कुरा राखेँ । हामीले पार्टी कार्यालय जाँदा ठाडो शिरले छिर्न पाउनुपर्छ । नेता–कार्यकर्ताबाट उठाइएको एक एक सय रुपैयाँबाट नै सानो घर भए पनि बनाउनुपर्छ । त्यसपछि उहाँले अलि अलि मात्र टाउको हल्लाउनुभयो ।’

पार्टी स्थायी कमिटी सदस्य पाण्डेले आफूले खासगरी तत्कालीन पार्टी मालेको केन्द्रीय कमिटी बैठक बसेको झापा,मोरङ,बारा,धनुषा,महोत्तरी, धादिङ, कास्की आदि ठाउँमा नेता–कार्यकर्तालाई आश्रय, सुरक्षा र विभिन्न सम्पर्क गराइदिने निम्नस्तरका श्रमिक,महिला आदिका बारे र तिनसँग जोडिएका घटना–प्रसङ्गलाई मात्र समेटेको बताउँदै पुस्तक अङ्ग्रेजी, इबुक र अडियो बुकका रूपमा पनि आउने बताइन् । एमाले पाठ्यपुस्तकमा राखिने, प्राप्त सुझावका आधारमा केही महिनामा अर्काे संस्करण ल्याइने जानकारी दिइन् ।

कार्यक्रममा नेपाल प्राध्यापक सङ्घका पूर्वाध्यक्ष रामेश्वर उपाध्याय,एमाले स्कुल विभाग सदस्य रामशरण प्याकुरेल र साहित्यकार तथा पत्रकार श्याम रिमालले कृति समीक्षा गर्दै कम्युनिस्ट आन्दोलनका कृति धेरै भए पनि ‘भुइँमान्छे’ को चर्चा अतुलनीय रहेको बताए । उनीहरुका अनुसार उक्त कृति शैक्षिक सामग्री बन्नसक्छ । 

विचार कसैको पनि पेवा नभएको धारणा राख्दै वक्ताहरूले पार्टीको मूल्यमान्यतामा लाग्ने हो भने पुस्तकको सन्देश सबैले ग्रहण गर्नुपर्नेमा जोड दिए । कृतिमा पुनरुक्ति र तथ्यतथ्याङ्कमा भएका दोष हटाउँदै यसलाई अझ पूर्णता दिन नेत्री तथा कृति लेखकलाई सुझाव दिइएको छ । 

कार्यक्रममा एमाले नेता तथा पूर्वपरराष्ट्रमन्त्री महेन्द्रबहादुर पाण्डेले विचार निर्माण गरेपछि वैज्ञानिक ढङ्गले पुष्टि हुनुपर्ने तथा अध्ययन गरेको कुरा बुझेर विश्लेषण गर्नुपर्नेमा जोड दिए । कसैका अघिल्तिर सत्य कुरामा टाउको कहिल्यै नझुकाउन पनि लेखिकालाई सुझाव दिए ।

बागमती प्रदेशका पूर्वमन्त्री तथा एमाले नेता केशवराज पाण्डेले नेता र पार्टीप्रतिको विश्वास जोगाउन कृति अध्ययन गर्न आग्रह गरेका छन् । निलम्बित एमाले केन्द्रीय सदस्य उषाकिरण तिम्सिनाको कृति पुर्खाले गरेको समर्पण र त्यागको श्वेतपत्र भएको विचार छ । पार्टी नेता–कार्यकर्तालाई आफ्नो कसमबाट दायाँबायाँ लाग्यौँ कि भनी आत्मसमीक्षा गर्नमा तिम्सिनाले जोड दिइन् । त्यस्तै परिषद्का अध्यक्ष रामहरि रिमालले लेखिकाले पत्थरको जवाफ फूलले दिएर उदारता प्रदर्शन गरेको विचार राखे । 

राजनीतिमा महिला सहभागिताको सशक्तीकरण विषयमा काठमाडौँ विश्वविद्यालयबाट विद्यावारिधि प्राप्त उनका यसअघि ‘धर्तीमाथिको दाबीः अधिकारको लडाइँ’, ‘नेपाली राजनीतिमा महिला’, ‘समानताका पाइलाहरू’, ‘संसदीय राजनीतिमा लैङ्गिक सहभागिता’ लगायत कृति प्रकाशित छन् । 

गत कात्तिक २५ गते एमालेले कीर्तिपुरमा नयाँ मुख्यालय बनाउन व्यवसायी मीनबहादुर गुरुङले जग्गा दिने र बनाउने सर्तमा भवन शिलान्यास गरिएकाले सोको विरोधमा आवाज उठाएपछि पाण्डे र तिम्सिनालाई पार्टीले छ महिनाका लागि निलम्बन गरेको थियो । तर, आजसम्म कारबाहीको पत्र नदिइएको र तोकिएको अवधिसमेत नाघिसकेको अवस्था  छ ।

कार्यक्रममा मालेकालमा नुवाकोट र धादिङमा भूमिगत रहेर सङ्गठन विस्तार गर्ने युवराज कार्की, नरनाथ लुइँटेल र सुरेशकुमार कार्कीलगायत एमालेका नेता एवं कार्यकर्ता र बुद्धिजीवीको सहभागिता थियो ।