विदेशमा ‘अनलाइन ठगी’ मा संलग्न गराइएका पाँच नेपाली आइपुगे

गैरकानुनी रुपमा म्यानमार पुर्याएर अनलाइन स्क्यामिङ्गमा लगाइएका पाँच नेपाली स्वदेश फर्केका छन् । मेवाडीबाट उद्धार गरी थाइल्याण्ड ल्याइएका उनीहरुलाई आज स्वदेश फिर्ता पठाइएको बैंककस्थित नेपाली राजदूतावासले जनाएको छ । 

तीमध्ये चार जना पुरुष र एक जना महिला रहेको दूतावासले जानकारी दिएको छ । ‘अनलाइन स्क्यामिङ्ग कार्यमा लगाइएका नेपाली नागरिकहरुलाई नेपाली राजदूतावासले थाइल्याण्ड सरकारको सहयोगमा म्यानमारको मेवाडीबाट उद्धार गरी टाक इमिग्रेशन अफिस मेसोट हुँदै थाइल्याण्ड ल्याई चार जना पुरुष र एक जना महिला गरी पाँच जनालाई आज मिति फागुन ९ गतेका दिन नेपाल फर्काइएको छ’,दूतावासद्वारा जारी विज्ञप्तिमा उल्लेख छ । 

त्यसैगरी, दूतावासले मापदण्डबमोजिम श्रम स्वीकृति लिएर मात्र वैदेशिक रोजगारीमा आउन आग्रह गरेको छ । छिटो पैसा कमाउने हेतुले प्रलोभनमा परी कम्बोडिया, लाओस, म्यानमार र थाइल्याण्ड नआउन भन्दै दूतावासले सचेत गराएको छ ।