बिजुली चुहावटमा कमी, अझै कम गर्ने प्राधिकरणको दाबी

नेपाल विद्युत प्राधिकरणले चालु आर्थिक वर्ष २०७९–८० को पहिलो सात महिनामा विद्युत चुहावटमा उल्लेख्य कमी आएको बताएको छ । प्राधिकरणले वितरणतर्फको विद्युत चुहावट सात दशमलव ९९ प्रतिशतमा सीमित भएको जानकारी दिएको छ । 

नियमित रुपमा विद्युत आपूर्ति र प्राविधिक तथा गैरप्राविधिक चुहावट नियन्त्रणका लागि सञ्चालित अभियानबाट प्राधिकरणले गत वर्षको तुलनामा एक दशमलव ६६ प्रतिशतले चुहावट घटाएको बताइएको छ । 

गत वर्षको माघ महिनासम्म वितरणतर्फको विद्युत चुहावट ९ दशमलव ३५ प्रतिशत थियो । त्यस्तै, समग्र विद्युत चुहावट १० दशमलव ८६ प्रतिशत रहेको बताइन्छ । गत माघसम्म वितरणतर्फको विद्युत चुहावट तीन दशमलव ९८ प्रतिशत बिन्दुले घटेर चार दशमलव ८९ प्रतिशतमा सीमित भएको छ । 

गत असार मसान्तसम्म चुहावट आठ दशमलव ८७ प्रतिशतमा सीमित थियो । यता, प्रशारणतर्फको माघसम्मको चार दशमलव ६० प्रतिशतसहित प्रणालीको समग्र विद्युत चुहावट १२ दशमलव ५९ प्रतिशतमा झरेको प्राधिकरणको दाबी छ । 

समग्र प्रणालीको विद्युत चुहावट १५ दशमलव ३८ प्रतिशत थियो । चालु आवको माघसम्म वितरण प्रणालीमा पाँच अर्ब ७३ करोड २२ लाख युनिट विद्युत उत्पादन भएकोमा पाँच खर्ब २७ करोड ४१ लाख युनिट विद्युत बिक्री भएको पाइएको छ । 

प्राधिकरणकाअनुसार चार करोड ५८ लाख युनिट विद्युत चुहावट भएको छ । प्रणालीमा भएकोमध्ये सबैभन्दा ठूलो चुहावटको हिस्सा वितरणतर्फ हुन्छ । प्राधिकरणले चालु आवमा समग्र प्रणालीको चुहावटलाई १४ प्रतिशतमा झार्ने लक्ष्य राखेको छ । 

त्यस्तै, वितरणतर्फको चुहावटलाई आठ दशमलव ५ प्रतिशतमा झार्न सकिनेमा प्राधिकरण विश्वस्त देखिन्छ । प्राधिकरणका कार्यकारी निर्देशक कुलमान घिसिङले गर्मीमा तराईमा केही मात्रामा विद्युतको चोरी बढेपनि प्राविधिक र गैरप्राविधिक चुहावटका लागि चालिएको कदमले यसलाई घटाउने दाबी गरेका छन् ।

विद्युत चोरी न्यूनीकरणका लागि प्राधिकरणले अभियान नै सञ्चालन गरेको उनको भनाइ छ । ‘ग्राहकका घरमा राखिएका मीटर रिसिलिङ, बक्यौता नतिर्ने तथा कालोसूचीमा रहेका ग्राहकको लाइन काट्ने, छड्के मीटर रिडिङ गर्ने, हुकिङबाट हुने चोरी नियन्त्रणका लागि नियमित अनुगमन गर्ने गरेका छौं’, उनले भने । 

साथै, यस अवधिमा धेरै पूराना तथा ओभरलोड भएका कन्डक्टर तथा ट्रान्सफर्मरहरु फेरेको जानकारी पनि दिए । प्राधिकरणले प्रत्येक प्रादेशिक तथा प्रदेश डिभिजन कार्यालय र ती मातहतका वितरण केन्द्रहरुलाई चुहावट नियन्त्रण गर्न सक्दो उपाय अपनाउन निर्देशन दिएको छ । 

वितरण केन्द्रले स्थानीय तहको सहयोगमा विद्युत चोरी गर्नेलाई कारबाही गर्दै आएको छ । प्राधिकरणका सातवटा प्रादेशिक कार्यालय र दुई वटा प्रदेश डिभिजन कार्यालय मातहतका वितरण केन्द्रमध्ये सबैभन्दा बढी चुहावट मधेश प्रदेशमा हुने गरेको छ । 

प्रादेशिक कार्यालय जनकपुर मातहतका २३ वटा वितरण केन्द्रले १२ दशमलव ३० प्रतिशत रहेको चुहावट घटाएर ११ दशमलव ७८ प्रतिशतमा झारेको विवरण पनि देखाइएको छ ।