रुपन्देहीमा म्यादी प्रहरी बन्न पचपन्न सय बढीले दिए परीक्षा

बैशाख ३० गते हुन लागेको स्थानीय तह निर्वाचनको तयारी तीव्र गतिमा अगाडि बढेको छ । निर्वाचनका लागि उम्मेदवारी घोषणा,घरदैलो कार्यक्रम,मत संख्याको अनुमान, प्रचारप्रसार लगायतका कार्य पार्टी तथा उम्मेदवारका तर्फबाट हुन थालेका छन् । चोक चोकमा यसपालि भोट कसलाई दिने ? हाम्रोलाई दाेहोर्याउने वा राम्रो ल्याउने भन्ने बहस सर्वसाधारणमा पनि व्यापकरुपमा चलेको छ ।

निर्वाचन मुखमा आइपुग्दा कानुन पालना गराउने निकायहरु निर्वाचन आयोग तथा नेपाल प्रहरी पनि व्यस्त देखिन्छन् । आयोगले चुनावमा स्वस्थ प्रतिस्पर्धा होस् भन्दै यसअघि नै आचारसंहिता जारी गरेको छ ।

यता,रुपन्देही प्रहरीले भने चुनावमा आयोगले जारी गरेको आचारसंहिताको अक्षरश: पालना गर्ने बताएको छ । जिल्ला प्रहरी कार्यालयका प्रवक्ता नवरत्न पौडेलले निर्वाचनमा हुनसक्ने संभावित घटनाप्रति आफूहरु सजग रहेको जानकारी दिनुभयो । हाल नेपाल प्रहरी म्यादी प्रहरीको छनोटमा जुटेको छ । आज रुपन्देहीमा २ हजार ५ सय २१ पदका लागि ५ हजार ६ सय २३ जनाले परीक्षा दिएका छन् । कूल ९ हजार ४ सय २३ जनाले म्यादीमा आवेदन दिएपनि ३ हजार ८ सय २० जना शारीरिक परिक्षणबाटै बाहिरिएका थिए ।

प्रहरी प्रवक्ता पौडेलका अनुसार २२ गते नतिजा सार्वजनिक गर्नुपर्ने आदेश छ । तर, २२ गते नतिजा सार्वजनिक गर्न नसकेमा एक दिन म्याद थपेर २३ गते नतिजा निकाल्न सकिने व्यवस्था छ । म्यादी प्रहरीको छनोट लिखित र अन्तर्वार्ताको नतिजाका आधारमा हुनेछ । लिखित परिक्षाको नतिजा आएपछि अन्तर्वार्ता हुने छ ।