आपतकालीन इजलास गठनको रिटमा कारण देखाऊ आदेश

मुलुकमा आपतकालीन अवस्था आएको खण्डमा तत्काल न्यायिक पहुँचको सुनिश्चित गर्न माग गर्दै परेको रिटमा कारण देखाऊ आदेश जारी भएको छ । 

सर्वोच्च अदालतका न्यायाधीश नृपध्वज निरौलाको एकल इजलासले आज सरकारको नाममा कारण देखाउन आदेश दिएको हो । कानुनका विद्यार्थीहरू रोशन आउजी, निकेश नेपाल र विवेक चौधरीले बन्द, सार्वजनिक बिदा वा नियमित इजलास नबस्ने समयमा नागरिकको जीवन, स्वतन्त्रता, सम्मान र सम्पत्तिमा खतरा उत्पन्न हुँदा न्याय नपाउने अवस्था संविधानविपरीत हुने भन्दै सर्वोच्चमा रिट दायर गरेका थिए । 

नेपालको संविधान, २०७२ को धारा २० अन्तर्गतको न्यायको हकअन्तर्गत ‘छिटो तथा आपतकालीन न्यायिक पहुँच’ मा आपतकालीन इजलास समावेश हुने जिकिर गर्दै रिटकर्ताले तत्काल इजलास गठन गर्न माग गरेका छन् । 

२४ सै घण्टा सञ्चालन हुनेगरी सर्वोच्चमा आपतकालीन इजलास गठन गर्नुपर्ने माग छ ।