भुसको आगो बन्दै नागाल्याण्डमा एचआईभी एड्स संक्रमण

भारतको उत्तरपूर्वी राज्य नागाल्याण्डमा उच्च दरमा फैलिरहेको एचआईभी संक्रमण नियन्त्रणका लागि दुई महिनासम्म चल्ने सचेतना अभियान थालिएको छ । सरकारी तथ्याङ्क अनुसार १५–४९ वर्ष उमेर समूहका १.३७ प्रतिशत वयस्क उक्त संक्रमणको शिकार बनेका छन् ।

राज्यका स्वास्थ्य अधिकारीहरूले जनचेतना बढाउँदै रोकथाम र उपचारसम्बन्धी जानकारी गाउँ–सहरमा पुर्याउने उद्देश्य राखेको बताएका छन् । स्वास्थ्यमन्त्री पि. पाइवाङ कोन्याकका अनुसार नयाँ संक्रमण घटे पनि स्थिति अझै चिन्ताजनक छ। असुरक्षित यौन सम्पर्कबाट ८५ प्रतिशत, सुईको प्रयोग गर्ने लागूपदार्थ दुर्व्यसनीमा ८.७ प्रतिशत र आमाबाट नवजात शिशु संक्रमणको दर ५.४ प्रतिशत देखिन्छ । 

गत महिनादेखि थालिएको अभियानमा गाउँ सभा, विद्यालय तथा कलेज कार्यक्रम, विशेष परीक्षण शिविर, साइकल र्याली, सांस्कृतिक प्रस्तुति र सामाजिक सञ्जालमार्फत जनचेतना फैलाइएको छ ।अभियानमा राज्यका ५२० गाउँमा जनचेतना फैलाउने लक्ष्य राखिएको छ।

विगतको अभियानमा एक लाख १५ जार ५४१ जनासम्म पहुँच पुर्याएको थियो। यस वर्ष थप संख्याबीच जनचेतना फैलाउने र समाजमा एचआईभीविरुद्ध सहकार्य र बुझाइको संस्कृति स्थापना गर्ने लक्ष्य राखिएको अधिकारीहरुले जनाएका छन् ।

स्रोत : इण्डिया न्युज नेटवर्क ।