चिनियाँ युवकको अद्भूत कलाबाट सबै चकित

चीनको मध्यभागमा रहेको हेनान प्रान्तको राजधानी चङ्चौबाट झण्डै दुई घण्टाको सडक यात्रापछि पुगिन्छ प्राचीन चीनकै प्रख्यात राजधानी शहर काइफाङ । प्राचीनकालमा चीनको राजधानी फरक फरक समयमा आठ भिन्दाभिन्दै स्थानमा तोकिएको थियो । त्यसमध्येको एक हो चङ्चौबाट पूर्वको सुन्दर शहर काइफाङ ।

सोही शहरमा २६ वर्षे सन् छाउ लले आफ्नो कलाबाट लाखौंलाई मोहित र चकित पारिसकेका छन् । हेनानबाट दक्षिणपूर्वमा पर्ने आन्हुई प्रान्तका उनी काइफाङमा व्यावसायिक जिम्न्यास्टिक डान्सर हुन् । गत महिना चङ्चौमा आयोजित सांघाई सहयोग संगठनको मिडिया तथा थिङ ट्याङ्क सम्मेलनका सयौं विदेशी तथा स्वदेशी पाहुनाले उनको कलाको मुक्तकण्ठले प्रशंसा गरेका छन् ।

स्थानीय डबल ट्रि हिल्टन काइफाङ होटलमा पाहुनाको सम्मानमा आयोजित स्वागत समारोहमा सन्को प्रस्तुतीले सबैलाई मोहित पारेको थियो । स्थानीय नगरपालिका, स्थानीय नगर जनसरकारले आयोजना गरेको कार्यक्रममा उनले आफ्नो जिम्न्यास्टिक कला देखाएका हुन् ।

सात वर्षको उमेरदेखि जिम्न्यास्टिक थालेका उनी यसमा निरन्तर लागिपरेको दुई दशक हुन लागेको छ । भन्छन्, ‘शुरु शुरुमा निकै गाह्रो भयो । पछि नियमित तालिमले सजिलो हुँदै गयो । दर्शकबाट पाउने मायाले सबैभन्दा बढी खुशी दिन्छ ।’

जनआस्थाकर्मीसँगको कुराकानीमा उनले भने, ‘भविश्यमा विश्वव्यापी प्रतिस्पर्धामा भाग लिएर सफलता हात पार्ने लक्ष्य छ ।’ आफ्नो पेशाप्रति उनले निकै गर्व गरेका छन् ।