मुख्यमन्त्रीलाई विश्वासको मत दिनुपर्ने कांग्रेस सांसदहरु गायब

बागमती प्रदेशका नवनियुक्त मुख्यमन्त्री इन्द्रबहादुर बानियाँले विश्वासको मत लिने अन्तिम तयारी गरिरहँदा नेपाली काँग्रेसका प्रदेश सदस्यहरु सम्पर्कविहीन बनेका छन् । निर्वतमान मुख्यमन्त्री बहादुरसिंह लामासहित १४ सांसद मोबाइल अफ गरेर सम्पर्कविहीन भएपछि आपत परेको छ ।

जनआस्थाले लामा र उनी निकट केही सांसदको मोबाइलमा सम्पर्क गर्न खोज्दा पनि अफ सुनिन्छ । यद्यपि, उनीहरु काठमाडौँमै रहेको काँग्रेस स्रोतको दाबी छ ।

तीनजना मन्त्री नियुक्त हुनुपर्ने बटमलाइनसहित पार्टी सभापति शेरबहादुर देउवासँग छलफल गरेर हेटौंडा फर्किएको भनिएका उनीहरु एकाएक सम्पर्कविहीन भएका हुन् । 

११० सदस्यीय प्रदेश सभामा बानियाँलाई विश्वासको मत प्राप्त गर्न ५६ सांसदको समर्थन आवश्यक हुन्छ । हाल एमालेका २७ र कांग्रेसका ३७ प्रदेश सभा सदस्य छन् । तर अन्तिम अवस्थामा लामासहित १४ जना सम्पर्कविहीन भएपछि मुख्यमन्त्री बानियाँ अफ्ठ्यारोमा परेका हुन् । 

यद्यपि, राष्ट्रिय प्रजातन्त्र पार्टीलाई भए पनि सरकारमा सहभागी गराएर आजै विश्वासको मत लिने बानियाँको तयारी छ । प्रदेशसभामा राप्रपाका १३ सांसद छन् ।