मेयर थापा भ्रष्टाचारी ठहर, अवैध आम्दानी साढे तीन करोड

विशेष अदालतले सर्लाहीको बागमती नगरपालिकाका मेयर भरतकुमार थापालाई भ्रष्टाचार मुद्दामा दोषी ठहर गरेको छ । अदालतले तीन करोड ४५ लाख २२ हजार ३८७ गैरकानुनी रूपमा आर्जन गरेको ठहर गर्दै मेयर थापालाई एक वर्ष कैद र बिगो बराबरको रकम जरिवाना हुने फैसला सुनाएको छ ।

न्यायाधीशहरू अदालतका अध्यक्ष टेकनारायण कुँवर, मुरारीबाबु श्रेष्ठ र विदुर कोइरालाको इजलासले अख्तियार दुरुपयोग अनुसन्धान आयोगले थापाको कूल आम्दानी नौ करोड १४ लाख ३१ हजार र खर्च १२ करोड ५९ लाख ५३ हजार हुँदा तीन करोड ४५ लाख २२ हजार ३८७ बढी आर्जन देखाएको रकमलाई स्रोत पुष्टि हुन नसकेको ठहर गरेको छ । उक्त रकमलाई भ्रष्टाचार निवारण ऐन, २०५९ को दफा २०(१) बमोजिमको कसूर ठहर गरिएको छ ।

अदालतले मेयर थापालाई नदीजन्य पदार्थको ठेक्कामा हानिनोक्सानी पुर्याएको अर्को भ्रष्टाचार मुद्दामा पनि दोषी ठहर गरेको छ । उक्त मुद्दामा ३० करोड २९ लाखभन्दा बढीको नदीजन्य पदार्थमा हानिनोक्सानी गरेको ठहर गर्दै अदालतले थापालाई भ्रष्टाचार निवारण ऐन, २०५९ को दफा १७ बमोजिम कसूर गरेको ठहर गरेको छ ।