वाणिज्य बैंकको अध्यक्षमा ढकाल

राष्ट्रिय वाणिज्य बैंकको अध्यक्षमा देवकुमार ढकाल नियुक्त भएका छन् । नेपाल राष्ट्र बैंकका पूर्व कार्यकारी निर्देशक ढकाललाई उपप्रधानमन्त्री तथा अर्थमन्त्री विष्णु पौडेलले बैंक सञ्चालक समितिको सदस्यमा नियुक्ति गरेपछि बिहान बसेको समिति बैठकले उनलाई अध्यक्ष चयन गरेको हो । ढकालले राष्ट्र बैंकका गभर्नर डा. विश्वनाथ पौडेलसमक्ष आजै पद तथा गोपनीयताको शपथ लिइसकेका छन् ।

राष्ट्र बैंकबाट गत मंसिरमा अवकाश पाएका ढकाल गभर्नर नियुक्तिको क्रममा पनि चर्चामा आएका थिए । साढे चार वर्षअघि रिक्त डेपुटी गभर्नर नियुक्तिमा सशक्त उम्मेदवारका रुपमा उनी र अर्का कार्यकारी निर्देशक डा. प्रकाशकुमार श्रेष्ठलाई लिइएको थियो । तर, झापाका दुई जनालाई डेपुटीमा नियुक्त गरेपछि मोरङका ढकाल र अर्घाखाँचीका श्रेष्ठ चर्चामा सीमित भएका हुन् । 

गत जेठमा अवकाशप्राप्त श्रेष्ठ यतिखेर राष्ट्रिय योजना आयोगमा सदस्य छन् ।