छात्रालाई शिक्षकले लेखेको म्यासेज ‘ह्याप्पी बर्थ डे मेरी जान, आई लभ यु’

रौतहतको गरुडा नगरपालिका–९, स्थित माध्यमिक विद्यालय श्रीपुर गम्हरियाका शिक्षक रविन्द्र साह पक्राउ परेका छन् । विद्यालयकी छात्रालाई अशिष्ट र आपत्तिजनक म्यासेज पठाएको आरोपमा प्रहरीले उनलाई नियन्त्रणमा लिएको हो ।

साहले एसईई उत्तीर्ण एक छात्रालाई हालै ‘ह्याप्पी बर्थ डे मेरी जान, आई लभ यु’ लेखेर म्यासेज पठाएका थिए । उक्त म्यासेजबारे ती छात्राले आफ्नो परिवारलाई सुनाएपछि आज बिहान विद्यार्थी र परिवारजनले विद्यालय परिसर तोडफोड गरेका थिए । 

त्यसपछि घटनास्थल पुगेको प्रहरी टोलीले स्थिति नियन्त्रणमा लिन अश्रुग्यास हान्नुका साथै शिक्षक साहलाई नियन्त्रणमा लिएको हो । जिल्ला प्रहरी कार्यालय रौतहटबाट डिएसपी दीपक रायका अनुसार उनीमाथि आवश्यक अनुसन्धान भइरहेको छ ।