साढे चार करोड घोटालाको आरोप, २५ हजार धरौटी माग

भ्रष्टाचार मुद्दा लागेका काठमाडौं महानगरपालिकाका तत्कालिन प्रमुख प्रशासकीय अधिकृत प्रदीप परियारलाई धरौटी छोड्न आदेश भएको छ । 

विशेष अदालतका न्यायाधीश तेज नारायण सिंह राई, राम बहादुर थापा र रितेन्द्र थापाको इजलासले २५ हजार धरौटीमा छोड्ने आदेश दिएको हो । परियार आज आफैँ अदालतमा हाजिर हुन पुगेका थिए । 

ढल निर्माणमा घोटाला गरेको अभियोगमा परियारसँगै मुद्दा चलाइएका महानगरका कर्मचारी बसन्त आचार्य र नमराज ढकाललाई ५०-५० हजार रुपैयाँ धरौटीमा छाड्न अदालतले आदेश दिएको छ । तीनै जनामाथि ढल निर्माणको ठेक्का लगाउँदा ठेकेदारसँग मिलेमतो गरी भ्रष्टाचार गरेको अख्तियारको दाबी छ । 

यो प्रकरणमा चार करोड ३१ लाख ७२ हजार रुपैयाँ हिनामिना गरेको दाबीसहित अख्तियारले सात जनाविरुद्ध जेठ २८ गते मुद्दा दायर गरेको थियो ।