सरकारले राम्रो काम गरेकाले प्रचण्ड छट्पटाएको शंकरको दाबी

नेकपा एमालेका महासचिव शंकर पोखरेल फेरि एकचोटि प्रमुख प्रतिपक्षी नेकपा माओवादी केन्द्रका अध्यक्ष पुष्पकमल दाहाल प्रचण्डमाथि खनिएका छन् । सरकार लक्षित प्रचण्डका सार्वजनिक टिप्पणीलाई सत्ता गुमाउनुको पीडा र छटपटीको अर्थ लगाउँदै आएका उनले आज पनि त्यहि कुरा दोहोर्याएका हुन् । 

पूर्व प्रधानमन्त्रीसमेत रहेका प्रचण्डले हिजो पाँचथरको फिदिममा आयोजित आमसभालाई सम्बोधन गर्दै सरकारलाई ‘रुझेको बिरालो’को संज्ञा दिएका थिए । उनले भनेका थिए, ‘सरकारसँग दुई तिहाई बहुमत त छ, तर मनैदेखि चाहिँ आफैँ डराएर रुझेको बिरालो भएको छ ।’

विपक्षी दलका नेताको उक्त अभिव्यक्तिको सामाजिक सञ्जालमार्फत खण्डन गर्दै शंकरले ‘प्रचण्डजी तपाई के बोल्दै हुनुहुन्छ ?’ भन्दै जवाफ फर्काएका हुन् । अघिल्लो सरकारको पालामा भन्दा अहिले राजश्वमा उल्लेख्य वृद्धि भएको, विदेशी मुद्राको सञ्चिति बढेको, निर्माणी व्यवसायीको भुक्तानी भएको र निर्माण ठप्प रहेका ठूला आयोजनाको कामले तिब्रता पाएको उनको दाबीसमेत छ । 

यस्ता विभिन्न तथ्यहरुले प्रचण्डमा बैचनी बढेको उनले आरोप लगाए । 

यस्तो छ शंकरको दाबी 

तपाई प्रधानमन्त्री हुदाको भन्दा राजश्वमा उल्लेख्य वृद्धि भएको छ ।

विदेशी मुद्राको संचिति वढेको छ ।

सोधनान्तर स्थितिमा उल्लेख्य बचत छ ।

निर्माण व्यावसायिलाई कामवापतको तपाईको नेतृत्वको सरकारले दिन नसकेको भुक्तानी प्रदान गरिएको छ ।

निर्माण ठप्प रहेका ठुला आयोजनाहरुको काममा तिव्रता आएको छ । जस्तो पोखरा -मुग्लिन सडक, गैडाकोट- वुटवल सडक आदी ।

भुकम्प र वाढि पिडितका क्षतिग्रस्त आवास निर्माणका लागि श्रोतको व्यवस्था भएको छ ।

वैंकको तरलता वृद्धि भएको छ । व्याजदर घटेको छ । लगानी वृद्धि हुन थालेको छ ।

कानून निर्माणको कामले तिव्रता पाएको छ ।

सहकारीमा भएको घोटालाको छानविन र कार्वाहीको प्रकृया अघि वढेको छ । साना वचत कर्ताको वचत फिर्ता गर्ने प्रकृया सुरुभएको छ ।

कानूनी सुधारको प्रकृयावाट लगानी योग्य वातावरण तयार भएको छ ।

क़ानून कार्यान्वयन गर्ने निकायले विना हस्तक्षेप काम गर्ने वातावरण तयार भएको छ ।

भूमि समस्याको समाधानको प्रकृया अघि वढेको छ ।

सरकारको स्थायित्वको आधार तयार भएको छ ।

उपरोक्त कारणले नै तपाईको पीडा र छटपटी वढेको देखिन्छ । होइन र ?