घर फर्केका विद्यार्थीहरुको अडान कायम, भैरहवामा विरोध प्रदर्शन

भारतीय राज्य ओडिसाको भुवनेश्वरस्थित कालिंगा इन्स्टिच्युट अफ इन्डस्ट्रियल टेक्नोलोजी (केआईआईटी) विश्वविद्यालयमा अध्ययनरत नेपाली विद्यार्थीहरूले माग पूरा नभएसम्म भारत नफर्कने बताएका छन् । उनीहरुले सुरक्षाको प्रत्याभूति नभएसम्म कलेज नफर्कने जनाएका हुन् । 

उनीहरुका १६ बुँदे माग लिखित रुपमा पूरा गर्नुपर्ने, विश्वविद्यालयका दोषी कर्मचारी र पदाधिकारीहरूलाई हटाउनुपर्ने माग राखेका छन् । केआईआईटी प्रशासनले अन्य मुलुकका र आफूहरुलाई फरक व्यवहार गर्ने गरेको घर फर्केका नेपाली विद्यार्थीहरुको आरोप छ ।

उता भारतीय विदेश मन्त्रालयले केआईआईटीमा भएको घटनाबारे अनुसन्धान भइरहेको जनाउँदै विद्यार्थीको सुरक्षामा ध्यान दिइने बताएको छ । यसैबीच शंकास्पद घटनामा ज्यान गुमाएकी प्रकृति लम्सालको न्याय माग गर्दै हिजो भैरहवामा विरोध प्रदर्शन गरिएको छ । उनीहरुले मृतक लम्साल र पीडित परिवारलाई निष्पक्ष न्याय दिलाउनुपर्ने, दोषीलाई कारबाही गर्नुपर्ने माग गरेका थिए ।