रवि लामिछानेमाथि अत्याचार भएको दावी गर्दै आयोगमा उजुरी

राष्ट्रिय स्वतन्त्र पार्टी (रास्वपा)ले हिरासतमा रहेका सभापति रवि लामिछानेमाथि प्रहरी प्रशासनले अमानवीय व्यवहार गरेको भन्दै राष्ट्रिय मानव अधिकार आयोग गुहारेको छ । 

कार्यवाहक महामन्त्री कविन्द्र बुर्लाकोटीले लामिछानेको जीवन रक्षाको माग गर्दै आज आयोगमा उजुरी दर्ता गराएका हुन् । हिरासतमा लामिछानेलाई  मानसिक यातना दिने कार्य भएको उजुरीमा उल्लेख छ । 

 ‘प्रहरी अनुसन्धानका लागि भनि लगिएको उहाँलाई कात्तिक २ गते रातिदेखि विभिन्न किसिमले मानसिक यातना दिनुका साथै मानवअधिकार समेत हनन हुने गरी राज्य संयन्त्रबाट अमानवीय, अपमानजनक तथा गैरन्यायिक व्यवहार हुँदै आएकोतर्फ सम्बन्धित सबैको ध्यानाकर्षण गराउँदछौं’, रास्वपाले भनेको छ । 

राज्य संयन्त्रले नियोजित रुपमा सञ्चारमाध्यम प्रयोग गरी लामिछानेविरुद्ध प्रचार प्रसार गराई बदनाम गरेको पनि रास्वपाको दावी छ । उजुरीमा भनिएको छ, ‘रवि लामिछानेको मानहानी, गोपनीयताको हननका साथै चरित्र हत्या गर्ने कार्य भइरहेको छ । यसरी न्यायिक प्रक्रियालाई प्रभाविक पार्न राज्यसंयन्त्र एक सार्वजनिक व्यक्तित्व विरुद्ध नियोजित रुपमा परिचालन गरिएको प्रष्ट छ ।’

लामिछाने सुतिरहेको अवस्थामा राति ११ बजे उठाएर प्रहरीले चितवनबाट पोखरा लैजाँदा लामिछानेको नैसर्गिक मानवअधिकार हनन भएको रास्वपाको ठहर छ । त्यस्तै, हिरासतबाटै लामिछानेको डायरी गायब पारेर सरकारले मौलिक तथा गाेपनियताको हक छिनेको जिकिर गरिएको छ । 

रास्वपाले लामिछानेको मौलिक अधिकार सुनिश्चित गर्न, उनीमाथि भएका मानव अधिकार हननका घटनाको सत्यतथ्य छानविन गर्न, दोषीलाई कानुनी बमोजिम कारवाही गर्न र लोकतान्त्रिक मानवअधिकारको रक्षार्थ सक्रिय कदम चाल्न आयोगसमक्ष आग्रह गरेकाे छ ।