रुकुमको रक्तदानमा सिडियो पनि सहभागी

नेपाल पत्रकार महासंघ रुकुम पश्चिम शाखाले नवौ संविधान दिवसको अवसरमा मुसिकोटमा आयोजना गरेको रक्तदान कार्यक्रममा प्रमुख जिल्ला अधिकारीसहित १६ जनाले रक्तदान गरेका छन् । चौरजहारीमा रहेको ब्लड बैंकमा रगत अभाव हुन थालेपछि महासंघले आज रक्तदान कार्यक्रमको आयोजना गरेको बताइएको छ ।

कार्यक्रममा बोल्दै जिल्ला समन्वय समिति रुकुमपश्चिमका प्रमुख लुम्बिनी गौतमले महत्वपूर्ण दिनमा सबैभन्दा उत्कृष्ट दान ‘रक्तदान’ गर्ने पुण्य कार्य भएको बताए । उनले मुलुकले नयाँ तर ऐतिहासिक संविधान पाएको दिनको सन्दर्भ उल्लेख गर्दै आजको दिनलाई सभ्य र भव्य रुपले मनाउन आवश्यक रहेको उल्लेख गरे । 

प्रमुख जिल्ला अधिकारी हरिप्रसाद पन्तले मुलुकले नयाँ संविधान पाएको नवौं वर्ष प्रवेशको सुअवसरमा रक्तदान गरिनु अर्को सुखद् समाचार भएको बताए । घरघरमा दिपावली गरिरहेको बेलामा बिरामीको ज्यान जोगाउन गरिएको प्रयास सह्रानीय भएको उनको भनाई छ । परिवर्तनलाई संस्थागत गर्दै संविधान कार्यान्वयनको अनूभुति दिलाउन सबै निकायले आआफ्नो स्थानबाट भूमिका निर्वाह गर्नुपर्नेमा उने जोड दिएका छन् ।

प्रमुख जिल्ला अधिकारी पन्तसहित १७ जनाले रक्तदान गरेको नेपाल पत्रकार महासंघका अध्यक्ष लक्ष्मण केसीले जानकारी दिए । संकलित रगत नेपाल रेडक्रस सोसाइटीले चौरजहारीमा सञ्चालन गरेको ब्लड बैंकमा उपलब्ध गराइएको छ । 

रुकुमपश्चिमसहित छिमेकी जिल्लाहरु जाजरकोट, सल्यान, रुकुम पूर्व र डोल्पा समेतका बिरामीहरुको सेवाको लागि सञ्चालित उक्त ब्लड बैंकमा रगत अभाव नहोस् भनेर संविधान दिवसको अवसरमा रक्तदान कार्यक्रम आयोजना गरिएको अध्यक्ष केसीले बताए । ‘रगतको अभावमा कुनैपनि बिरामीले ज्यान गुमाउन नपरोस् भन्ने अभिप्रायले रक्तदान गरिएको हो,’ उनले भने । 

सरकारी कर्मचारी, सुरक्षाकर्मी, व्यवसायी, पत्रकार र गैरसरकारी निकायका व्यक्तिहरुले स्वतस्फूर्त रुपमा रक्तदान कार्यमा सहभागी भएको जानकारी दिइएको छ । 

मानव विकास तथा सामुदायिक सेवा चौरजहारी अस्पताल, नेपाल रेडक्रस सोसाइटी रुकुमपश्चिम शाखा र उपशाखा चौरजहारीको प्राविधिक सहयोगमा रक्तदान कार्यक्रम सम्पन्न गरिएको हो । रक्तदाता र प्राविधिक सहयोग पुर्याएका स्वास्थ्यकर्मीहरुलाई महासंघको तर्फबाट सम्मान पत्र प्रदान गरिएको छ ।