मरेका कुखुराको मासु बजारमा, पोल्ट्री व्यवसायीहरु सिंहदरबारमा

दक्षिणी सीमा क्षेत्रका कोल्डस्टोरबाट मरेका कुखुराको मासु बजारमा पुर्याइएको भन्दै त्यसको प्रभावकारी नियन्त्रणका लागि पोल्ट्री व्यवसायीहरुले गृहमन्त्रीसँग गुहार मागेका छन् । 

गृह मन्त्रालयमै पुगेर उपप्रधान तथा गृहमन्त्री नारायणकाजी श्रेष्ठलाई भेटेका कुखुरा व्यवसायीहरुले त्यस्ता पोल्ट्री फम बन्द गराउन सरकारको ध्यानाकर्षणसमेत गराएको बताइन्छ । त्यसक्रममा कुखुराको मासुमा नेपाल आत्मनिर्भर भएपनि भारतीय कुखुरा तथा कुखुराजन्य पदार्थको गैरकानुनी ओसारपसारले आफूहरु चर्को मारमा परेको व्यवसायीहरुले गुनासो गरेका छन् ।

आर्थिक मन्दी, कर्जा प्रवाहको कमी, कमजोर क्वारेन्टाइन, संक्रामक रोग उपचारको अभाव जस्ता समस्यासँगै अवैध ओसारपसारले कुखुरापालकहरू पलायनमा पुगेको र उपभोक्ताको स्वास्थमाथि प्रतिकूल असर परेको चर्चा पनि त्यस क्रममा भएको थियो । गृहमन्त्री श्रेष्ठले अवैध चोरी निकासीले समग्र अर्थतन्त्र, राजस्व र औद्योगिक वातावरण चौपट हुने भएकोले कानुन नै संशोधन गरेर भएपनि यसको प्रभावकारी नियन्त्रण गरिने प्रतिबद्धता जनाएपछि व्यवसायीहरु हर्षित मुद्रामा सिंहदरबारबाट निस्किएका हुन् ।

गृहमन्त्रीले चासोका साथ आयोजना गरेको आज बिहानको सो बैठकमा नेपाल प्रहरी तथा सशस्त्र प्रहरीका महानिरीक्षकहरू, कानुन मन्त्रालयका सहसचिव, भन्सार, पशु सेवा तथा वाणिज्य–आपूर्ति विभागका महानिर्देशकहरू, क्वारेन्टाइन कार्यालयका अधिकारी र कुखुरापालनसँग सम्बन्धित उद्योगी व्यवसायीहरू सहभागी थिए ।