प्रदीप गिरीको अस्तुमाथि राजनीति गर्न खोजेको परिवारजनको आरोप

समाजवादी चिन्तक एंव नेपाली कांग्रेसका स्व.नेता प्रदीप गिरीको अस्तु विर्सजन कार्यक्रम राखेकोमा उनको परिवारले असन्तृष्टि जनाएको छ । 

प्रदीप गिरी पावन स्मृति आयोजक समितिले हिजो गिरीको स्मृतिमा ‘लोक एंव लोकतन्त्र सेतु गाथा काठमाडौंदेखि काशीसम्म’ कार्यक्रम घोषणा गरेको थियो । भद्रौ २ गतेबाट सुरु हुने सो यात्राका क्रममा वीरगञ्जको तिलवा नदीका साथै भारतको गंगा नदीमा अस्तु विर्सजन गर्ने कार्यक्रम समावेश गरिएको छ । 

तर, गिरीकी पत्नी भारती सिलवाल, छोरा सन्तोष र बुहारी उष्मा लामा सिलवालले विज्ञप्ति जारी गर्दै आफूहरुको अनुमतिबिना अस्तु विर्सजन कार्यक्रम राखेकोमा असन्तृष्टि व्यक्त गरेका हुन् । आफूहरु जीवित हुँदाहुदैँ कुनै सल्लाह र अनुमति नलिई सो कार्यक्रममा गिरीको अस्तु विर्सजन गर्ने क्रियाकलाप समाहित गरेकोमा स्तब्ध भएको उनीहरुको भनाई छ । 

विज्ञप्तिमा भनिएको छ, ‘सामान्यतयाः मृत व्यक्तिको सम्बन्धित परिवारसँग गाँसिएको यस्तो संवेदनशील विषयलाई कुनै पनि अमूक व्यक्ति वा संघसंस्थाद्धारा बिनास्वीकृति गर्न पाउने हिन्दु परम्परा र कानूनतः कुनै पनि रुपमा ग्राह्य छैन । यस्तो अशोभनीय क्रियाकलापले हामीलाई अत्यन्तै मर्माहत बनाएको छ ।’

कैयौंपटक मौखिम आग्रह र लिखित रुपमा अस्तु विर्सजन नगर्न अनुरोध गर्दागर्दै पनि सो समितिका नायक कञ्चन झा, रामपल्टन शाह र त्यस समितिसँग सलंग्न व्यक्तिहरुले आफ्नो आग्रहलाई लतारेर अस्तुको राजनीति गर्न खोजिरहेको उनीहरुको आरोप छ । 

‘यो बहानामा चन्द्रा उठाउने कार्य पनि निजहरुले गरिररहेका छन्, जुन हाम्रो लागि एकदर्म लज्जास्पद विषय भएको छ । जसमा हाम्रो कुनै सलंग्नता र सहमति नभएको सर्वसाधारणलाई जानकारी गराउँदछौं,’ विज्ञप्तिमा भनिएको छ, ‘त्यो अस्तु उनीहरुले कहाँबाट प्राप्त गरे ? कसरी प्राप्त गरे ? र, वास्तमा त्यो अस्तु नै स्व.प्रदीप गिरिको हो कि होएन भन्नेमा नै ठूलो प्रश्नचिन्ह उठेको छ ।’

आफूहरुसँग गिरीको अस्तु सुरक्षित रहेको उल्लेख गर्दै उनको आत्मा चिरशान्तिको लागि सो अस्तु विर्सजन कार्यक्रम नगरिदिन परिवारजनले विनम्र अनुरोध गरेको छ ।