ज्ञानबहादुरको बचाउमा राप्रपा नेता, गणतन्त्रको उपभोग गर्न पाउनुपर्ने जिकिर
राजसंस्था ब्युँताउने अभियानमा हिँडेको पूर्वपञ्चहरुको पार्टी राप्रपाका प्रवक्ता मोहन श्रेष्ठले गणतन्त्रको उपभोग गर्ने अधिकार गणतन्त्र नमान्नेहरुलाई पनि रहेको बताएका छन् ।
राप्रपाका सांसद ज्ञानबहादुर शाहीले संसदमा बोलेका कुरालाई लिएर प्रश्न उठ्न थालेपछि पार्टीका तर्फबाट श्रेष्ठको यस्तो प्रतिक्रिया आएको हो । आज सामाजिक सञ्जालमार्फत उनले भनेका छन्, ‘गणतन्त्रको निर्वाध उपभोग गर्ने अधिकार गणतन्त्रवादीलाई मात्रै होइन,गणतन्त्र नमान्नेहरुलाई पनि त्यत्तिकै छ ।’
प्रवक्ता श्रेष्ठले नेपालको स्वतन्त्रता, सार्वभौमसत्ता,भौगोलिक अखण्डता, राष्ट्रियता, स्वाधीनता, स्वाभिमान र नेपालीको हकहितको रक्षाबाहेक अन्य कुनै पनि धारा अपरिवर्तनीय नरहेकोले संविधानसमेत संशोधन गर्न सकिने प्रावधान स्मरण पनि गराएका छन् ।
आइतबार बसेको प्रतिनिधिसभा बैठकमा ज्ञानबहादुर शाहीले प्रधानमन्त्री पुष्पकमल दाहाल प्रचण्डविरुध्द सर्वाेच्च अदालतमा ‘युध्द अपराध’को मुद्दा चलाउनुपर्ने माग गर्दै रिट दर्ता भएको र जवाफका लागि बोलाएकाले प्रधानमन्त्रीबाट तत्काल राजीनामा दिनुपर्ने माग गरेका थिए । यसपछि माओवादी केन्द्रका सांसदहरुले नियमापत्ति जनाउँदै शाहीको भनाइ रेकर्डबाट हटाउन माग गरेका थिए ।
बैठक समापनपछि बाहिरिने क्रममा सञ्चारकर्मीसँग माओवादीका माधव सापकोटा र लेखनाथ दाहालले शाहीको भनाइमा आपत्ति जनाएका थिए । सांसद शाहीलाई संसदमा बोल्न माइक दिन नहुनेसम्म अभिव्यक्तिपछि राप्रपा प्रवक्ता श्रेष्ठले गणतन्त्रको उपभोग गर्ने अधिकार गणतन्त्र नमान्नेहरुलाई पनि रहेको जवाफ दिएका हुन् ।
टिप्पणीहरू