चिनियाँ कम्युनिष्ट पार्टीका नेताहरु बालुवाटारबाट पेरिस डाँडामा

नेपाल भ्रमणमा रहेको चिनियाँ कम्युनिष्ट पार्टीको सिचुआन प्रान्तीय कमिटीका नेताहरु नेकपा माओवादी केन्द्रको मुख्यालय पेरिसडाँडा पुगेका छन् । पार्टी सचिव वाङ सियाओहुईको नेतृत्वमा आएको १४ सदस्यीय टोलीले माओवादी नेताहरुसँग मुख्यालयमा शिष्टाचार भेट गरेको बताइएको छ ।

सो अवसरमा दुई पार्टीबीच थप सम्बन्ध विस्तार, सुदृढ गर्ने विषयमा छलफल भएको बताइएको छ । त्यसैगरी दुवै मुलुकका सरकारबीचमा पनि सम्बन्ध विस्तार र जनस्तरको सम्बन्धलाई प्रगाढ बनाउने विषयमा छलफल भएको जनाइएको छ ।

भेटघाटमा माओवादी उपाध्यक्ष कृष्णबहादुर महारा, महासचिव देव गुरुङ लगायत नेताहरुको उपस्थिति थियो । 

उक्त टोलीले प्रधानमन्त्री तथा माओवादी अध्यक्ष पुष्पकमल दाहाल प्रचण्डसँग उहाँको सरकारी निवास बालुवाटारमा भेटवार्ता गरेको थियो । बिहान चिनियाँ टोलीसँगको भेटपछि प्रधानमन्त्री दिउँसो साढे १ बजे नयाँ दिल्लीतर्फ प्रस्थान गर्नुभएको हो । 

प्रधानमन्त्री दाहाल भारत भ्रमणमा जानुअघि चिनियाँ कम्युनिष्ट पार्टीको उच्चस्तरीय टोलीले गरेको भेटवार्तालाई राजनीतिक वृत्तमा अर्थपूर्ण ढंगले हेरिएकाे छ ।