योग्यता विवादको अर्को गोलचक्करमा रवि लामिछाने

राष्ट्रिय स्वतन्त्र पार्टी (रास्वपा) का सभापति एवम् प्रतिनिधि सभा सदस्य रवि लामिछानेको योग्यतासम्बन्धी विवादमा पुनः अर्को रिट दर्ता भएको छ । 

रिट दर्तासँगै रविको प्रतिनिधि सभा सदस्य पदमा सर्वोच्च अदालतमा पुनः न्यायिक परिक्षण हुने भएको छ । प्रतिनिधि सभा सदस्यको विवादमा पेश भएको निवेदनलाई यसअघि सर्वोच्च प्रशासनद्वारा दर्ता गर्न अस्वीकार गरेको थियो । सोही निवेदनलाई न्यायाधीश तिलप्रसाद श्रेष्ठको एकल इजलासले अस्ति दर्ता गर्न आदेश दिएको हो । 

चितवन–२ मा भएको गत वैशाख १० गतेको उपनिर्वाचनपछि सिन्धुलीका युवराज पौडेल ‘सफल’ ले रविविरुध्द पुनः रिट दायर गरेका हुन् । यसअघि वैशाख २८ गते सर्वोच्च प्रशासनले रिट दरपिठ हुने आदेश दिएको थियो । 

न्यायाधीश श्रेष्ठको इजलासबाट दरपिठ खारेजसँगै हिजो रिट दर्ता भएको हो । नयाँ रिट दर्तापछि अर्को विवादले अदालतमा प्रवेश पाएको छ । सर्वोच्च प्रशासनको उक्त दरपिठ आदेशविरुध्द सफलले गत जेठ १ गते अर्को निवेदन दिएका थिए । सो निवेदनमाथिको बहसपछि न्यायाधीश श्रेष्ठको एकल इजलासले ‘नियमबमोजिम रिट दर्ता गर्नू’ भन्ने आदेश दिएपछि सुनुवाईको बाटो खुलेको हो । 

सफलले रविले पुनः नागरिकता प्राप्तिको प्रक्रिया नै पूरा नगरी जिल्ला प्रशासन कार्यालयबाट नेपाली नागरिकता लिएको दाबी गरेका छन् । त्यही नागरिकताका भरमा चितवन–२ को उपनिर्वाचनमा निर्वाचित भएकाले प्रतिनिधि सभा सदस्य हुन अयोग्य रहेको नयाँ प्रश्न सफलले खडा गरिदिएका हुन् ।

सफलले यसअघि पनि अयोग्यताको प्रश्न उठाउँँदै रिट दायर गरेका थिए । सोही रिटमा अमेरिकी नागरिकता त्यागेपछि नेपाली नागरिकता पुनः प्राप्तिको प्रक्रिया पूरा नगरेको ठहरसहित सर्वोच्चले रविको सांसद पद अवैध घोषित गरेको थियो । 

गत माघ १३ गतेको उक्त फैसलाअनुरुप रवि ‘अनागरिक’ घोषित भए । प्रतिनिधि सभा सदस्य पदका लागि समेत अयोग्य भएपछि चितवन–२ मा वैशाख १० गते उपनिर्वाचन भएको थियो । तर उपनिर्वाचनमा रवि नै विजयी भए । सफलले पुनः उनको योग्यतामा संवैधानिक र कानुनी प्रश्न उठाइदिएका छन् ।