बालिका दुर्व्यवहारमा उम्केर नेपाल फर्केका मिडिया सञ्चालक चेक बाउन्समा पक्राउ

नाइस टिभीका सञ्चालक धनबहादुुर पुन मगर उर्फ आशिर्वाद चेक बाउन्सको आरोपमा पक्राउ परेका छन् । श्रमजीवी पत्रकारहरुलाई तोकिएको पारिश्रमिक नदिएपछि उनी श्रमजीवी–पत्रकार संघ नेपालको उजुरीमा प्रहरी खोरमा पुगेका हुन् ।

मगरले ११ जना श्रमजीवी–पत्रकारको पारिश्रमिकवापत ६ लाख १३ हजार ९ सय ६४ रकम नदिएपछि प्रहरीसमक्ष उजुरी परेको बताइन्छ । रकम दिनुको सट्टा उनले सबैलाई खाता रोक्का भएको बैंकको चेक दिएका थिए । मगरलाई काठमाडौं प्रहरी कार्यालय टेकुमा राखिएको छ । काठमाडौं प्रहरी प्रमुख दानबहादुर कार्की र डिएसपी श्रीराम भण्डारीले पत्रकारहरुको पारिश्रमिक भुक्तानी गराइछाड्ने प्रतिबध्दता व्यक्त गरेको पीडित पत्रकारहरुले बताएका छन् । 

पुन मगर नौ वर्षअघि अमेरिकामा छँदा बालिकामाथि बलात्कार र दुर्व्यवहार गरेको आरोप लागेको थियो । उक्त आरोप लागेपछि उनी रातारात अमेरिकाबाट नेपाल फर्केको बताइन्छ । पुन त्यसअघि महिला संरक्षण तथा अधिकारसम्बन्धी फाउण्डेसनका संस्थापक थिए । उनले ओसारपसार तथा बेचबिखन र महिला हिंसा तथा दुर्व्यवहारमा परेका बालबालिकाको उध्दार गर्ने बताएका थिए । 
सन् २०१० देखि १२ सम्म उनलाई अमेरिकामा महिला हिंसा र दुर्व्यवहारको धेरै वटा आरोप लागेको थियो । सियाटलमा बस्दै आएका उनीमाथि १३ वर्षकी बालिकामाथि दुर्व्यवहार गरेको आरोप लागेको खबर त्यतिबेला अमेरिकी सञ्चारमाध्यममा प्रकाशित भएको बताइन्छ । 

पुनमाथि एउटी किशोरीमाथि नक्कली फेसबुक आईडीमार्फत् पटक पटक अनलाइनबाटै दुर्व्यवहार गरेको,सम्बन्ध राखेको आरोप लागेको हो । उनले किशोरीको फोटोसमेत दुरुपयोग गरेका थिए । अमेरिकी अदालतमा उनीविरुद्ध मुद्दाको प्रक्रिया शुरु हुँदै गर्दा पुनः त्यतिबेला रातारात नेपाल आइपुगेको बताइन्छ ।