खेलकुद विवाद अन्त्यका लागि खेलाडी नै तम्सिए

राष्ट्रिय खेलकुद परिषद् (राखेप) कर्मचारी संघ, राष्ट्रिय तथा अन्तर्राष्ट्रिय खेलाडी संघ र नेपाल ओलम्पियन संघले राखेप सदस्यसचिव विवाद अन्त्यको माग गर्दै विरोध र्याली निकालेका छन् । उनीहरूले युवा तथा खेलकुद मन्त्रालय, सरकार र सर्वोच्च अदालतको ध्यानाकर्षण गर्दै विरोध र्याली निकालेका हुन् ।

राखेप कर्मचारी संघका अध्यक्ष रञ्जन थापा, राष्ट्रिय तथा अन्तराष्ट्रिय खेलाडी संघका अध्यक्ष दीपक श्रेष्ठ र नेपाल ओलम्पियन संघका अध्यक्ष दीपक विष्टको नेतृत्वमा कर्मचारी, खेलाडी, प्रशिक्षक, ओलम्पिनहरूले राखेप प्राङ्गणबाट निकालेको र्याली दशरथ रंगशालाको मूलगेटमा पुगेर समापन भएको थियो ।

परिषदमा सदस्यसचिव नियुक्तिसम्बन्धी विवादको मुद्दा लामो समयदेखि सर्वोच्चमा विचाराधीन छ । जसका कारण खेलकुदका सम्पूर्ण गतिविधि ठप्प बनेको छ । कर्मचारीहरूले दुई महिनादेखि तलब पाएका छैनन् ।

त्यसैलाई सम्बोधन गर्दै खेलकुदका तीन संस्थाले सम्बन्धित निकायलाई ध्यानाकर्षणसहित छिटोभन्दा छिटो समस्या निराकरण गरी गाँठो फुकाउन आव्हानसहित विरोध र्याली निकालेका हुन् ।