राजीनामा दिएका असन्तुष्ट इञ्जिनियरहरुको वार्ता समिति

सरकारले आफ्ना माग पूरा नगरेको भन्दै शुक्रबार माइतीघर मण्डलामा बिरोध प्रदर्शन गरेका इन्जिनियरहरुले पुनर्निर्माण प्राधिकरणसँग वार्ता गर्न समिति बनाएका छन् । इञ्जिनियरहरुको माग पूरा नगरेको भन्दै आन्दोलनमा उत्रिएका उनीहरुले सरकारसँग वार्ता गर्न समिति गठन गरेका हुन् ।

धरहरा बनाउने हामी नै हौं,खाडी जान बाध्य नबनाइयोस्, प्राविधिकहरूको दुर्घटना बीमा लागू गर,कर्मचारी व्यवस्थापनको सुनिश्चितता गर,लाखौं भूकम्प पीडितको मुहारमा खुशी ल्याउने हामी हौं जस्ता नारा र प्लेकार्ड बोकेर आन्दोलन गरेका उनीहरुले पुनर्निर्माण प्राधिकरणका प्रमुख कार्यकारी अधिकृत सुशील ज्ञवालीसँग वार्ता गर्न ६ सदस्यीय समिति बनाएका हुन् ।

उक्त समितिमा ललितपुरका अविनाश अमर,धादिङका जोहन श्रेष्ठ,सिन्धुलीका निरजकुमार सिंह, काभ्रेका सद्दाम अलि खान, सिन्धुपाल्चोकका मिलन ढुंगाना र नुवाकोटकी रिताकुमारी शाही रहेका छन् ।