तेस्रो लहरको लागि तयार हुन आग्रह,स्वास्थ्य सामाग्री गाउँमा जोहो गर्न सुझाव

कोरोना महामारीको दोस्रो लहर शुरु भएको दुई महिनामा नेपालमा पहिलो लहरमा भन्दा दोब्बरले ज्यान गुमाएका छन् । ज्यान गुमाउने अधिकांशको कारक अक्सिजन अभाव रहेको बताइन्छ । दोस्रो लहरको शुरुमा मुलुकभर अक्सिजनको चर्को अभाव देखिएको थियो । त्यतिबेला धेरै सहयोगी संघ संस्थाले अक्सिजन कन्सन्ट्रेटर सहयोग गरेका थिए । अस्पताल तथा स्वास्थ्य संस्थाहरूले पनि तत्कालको निम्ति महँगोमा धेरै वटा कन्सन्ट्रेटर खरिद गरे ।

अहिले अधिकांश ठूला अस्पतालमा अक्सिजन प्लाण्ट र लिक्विड अक्सिजनको व्यवस्था मिलाइएको छ । पहिलो लहर शुरु भएदेखि झण्डै डेढ वर्षसम्म सरकारले अक्सिजन उत्पादन तथा वितरणमा ध्यान नदिएको चर्को मूल्य दोस्रो लहरको प्रारम्भमा भएको हजारौंको मृत्युवरणमा राज्य र नागरिकले व्यहोर्नु परेको तीतो यथार्थ हामी सबैका सामुन्ने छ । अब राजधानी र ठूला शहरका अस्पतालमा त्यस्ता कन्सन्ट्रेटरको जरुरत देखिँदैन ।

विज्ञहरूले आगामी केही समयभित्र विश्वभरि कोरोना महामारीको तेस्रो लहर आउनसक्ने चेतावनी दिएका छन् । त्यसैले कोरोनाका सिकिस्त बिरामीलाई तत्काल आवश्यक पर्ने त्यस्ता अक्सिजन कन्सन्ट्रेटर अब दुर्गमका जिल्ला अस्पताल र स्वास्थ्य संस्थाहरूमा काम लाग्ने भएको छ । राज्यले यसबीचमा प्राप्त गरेका अधिकांश अक्सिजन कन्सन्ट्रेटर समानुपातिक हिसाबले सबै जिल्ला र पालिकामा रहेका अस्पतालमा बेलैमा पुर्याएर तयारी अवस्थामा राख्न विज्ञहरूले सुझाव दिएका छन् ।

तेस्रो लहरको निम्ति अस्पतालहरूमा सुविधासम्पन्न बेड, भेण्टिलेटर र लिक्विड अक्सिजनको लागि आवश्यक भौतिक पूर्वाधारको जोहो गर्न ढिलो गर्न नहुने उनीहरूको भनाई छ । त्यसैले यसबीचमा ठूला अस्पलालले प्राप्त गरेका कन्सन्ट्रेटरलाई बिस्तारै जिल्ला अस्पताल र हेल्थ पोष्टमा पठाउनुको विकल्प नभएको बताइन्छ ।

अहिले पनि गाउँ गाउँमा कोरोनाको सिकिस्त बिरामी देखिएका छन् । मुलुकका धेरै ग्रामीण ठाउँमा पीसीआर परीक्षणको सुविधा छैन । परीक्षण नै गरे पनि नतिजा आउन एक साता लाग्ने भएकाले ती स्थानमा तेस्रो लहरको लागि बेलैमा तयारी गर्न विज्ञहरूले सुझाव दिएका छन् ।