अहिलेसम्म सूर्यमा भोट नहाल्नेलाई एमालेको टिकट

जनताको बहुदलीय जनवाद (जबज) लाई मार्गदर्शक सिद्धान्त मान्ने नेकपा एमालेमा फागुन २१ को प्रतिनिधिसभा निर्वाचनको टिकट वितरणमा अध्यक्ष केपी शर्मा ओलीको एकलौटी देखिएको छ । एघारौँ महाधिवेशनमा आफूसँग प्रतिष्पर्धा गरेका ईश्वर पोखरेल समूहलाई टिकट नदिएर उनले 'आफ्नै हात जगन्नाथ' गरेका हुन् । 

पोखरेलदेखि योगेश भट्टराई हुँदै गोकुल बाँस्कोटासम्मलाई उम्मेदवार नबनाउने संकेत ओलीले गरेका छन् । फरक बिचार समूहलाई सोत्तर पार्नकै लागि उम्मेदवार छनोटका लागि पार्टीले तय गरेको मापदण्ड कुल्चिइएको छ । 

एमालेको हिजो बसेको सचिवालय बैठकले १६५ मध्ये २३ क्षेत्रमा पछि निर्णय गर्नेगरी बाँकी उम्मेदवार छनोट गरेको थियो । त्यसमध्ये जिल्ला र प्रदेशबाट एकल सिफारिसमा परेकालाई 'आउट' गर्नेदेखि अहिलेसम्म सूर्य चिन्हमा भोट नहालेका पात्रलाई टिकट थमाउनेसम्मको अवस्था  देखिएको छ । 

प्रतिस्पर्धामा पहिलो मत ल्याएका र सोहीअनुसार तलबाट सिफारिस भएकाहरू ओलीको रोजाइमा परेनन् ।

एमालेका केही जिल्ला कमिटीले उम्मेदवारका आकांक्षी धेरै भएपछि मतदानमार्फत् तीन जनाको नाम सिफारिस गरेर केन्द्रमा पठाएको थियो । तर, प्रतिस्पर्धामा पहिलो मत ल्याएका र सोहीअनुसार तलबाट सिफारिस भएकाहरू ओलीको रोजाइमा परेनन् । दैलेख-२ मा सर्वाधिक मत ल्याएर पहिलो नम्बरमा सिफारिस भएका विष्णु रिजाल त्यसमध्येका एक हुन् । उनको ठाउँमा पञ्चायतकालमै चुनाव उठेका लक्ष्मीप्रसाद पोखरेलले ओलीले पाए । 

उम्मेदवार सिफारिसका लागि भएको निर्वाचनमा कार्यकर्ताले रुचाएका रिजालजस्तालाई टिकटबाट बन्चित गरेका ओलीले जिल्लाबाट फालिएका केही पात्रलाई भने मज्जैले टिपेका छन् । त्यसमध्येकी एक हुन्- पूर्वमाओवादी नेतृ ज्वाला साह । 

४७ जना मतदातामध्ये उम्मेदवार सिफारिस गर्न भएको मतदानमा जम्मा चार भोट ल्याएकी उनलाई सोही क्षेत्रको उम्मेदवार बनाउने निर्णय गरिएको छ । जिल्ला अध्यक्ष अध्यानन्द पाण्डेले सतप्रतिशत मत प्राप्त गरी पहिलो नम्बरमा सिफारिस भए पनि गुण्डुको मत जित्न नसक्दा टिकट पाएनन् ।

जिल्ला अध्यक्ष अध्यानन्द पाण्डेले सतप्रतिशत मत प्राप्त गरी पहिलो नम्बरमा सिफारिस भए पनि गुण्डुको मत जित्न नसक्दा टिकट पाएनन् । 

यता,राप्रपा,माओवादी,नयाँ शक्ति,काँग्रेस हुँदै दुई वर्षअघि एमाले प्रवेश गरेका रसुवाका प्रेमबहादुर तामाङ पनि गुण्डुको दिल जित्न सफल भए । एकमात्र निर्वाचन क्षेत्र रहेको त्यहाँ एमालेका पुराना नेताहरूको ठूलो पंक्तिलाई जिल्याउँदै विष्णु रिमालका विश्वासपात्र उनले टिकट हत्याएका हुन् । तामाङ २०५१ सालको मध्यावधि निर्वाचनमा राष्ट्रिय प्रजातन्त्र पार्टीको चुनाव प्रचारमा खटिएका थिए । त्यसपछि जनयुद्धमा लागेका उनी ०६४ को पहिलो संविधान सभा निर्वाचनमा माओवादीबाट सभासद चुनिए । ०७० सालमा माओवादीबाटै उठेका उनी पराजित भए । 

पार्टी छोड्ने र टिकटका लागि अर्को समाउने क्रममा २०७४ को चुनावमा बाबुराम भट्टराईको नयाँ शक्तितिर लागे । सो पार्टीबाट बागमती प्रदेशसभा सदस्य जितेका तामाङ कार्यकाल नसकिंदै कांग्रेस प्रवेश गरे । रोचक के छ भने एउटा दलको सांसद हुँदाहुँदै अर्को पार्टीको नेता बनेर महाधिवेशनमा प्रतिनिधित्व गर्ने अनौठो परिचय उनकै नाममा छ ।