मधेसका एमाले खम्बाले पार्टी छाडे

नेकपा (एमाले) का मधेश प्रदेश कमिटी सचिवालय सदस्य जयप्रकाश थारु आज पुष्पकमल दाहाल (प्रचण्ड) संयोजक रहेको नेपाली कम्युनिष्ट पार्टी (नेकपा) मा प्रवेश गर्ने भएका छन् । दुई दिनअघि एमाले छाडेका उनी नेकपा प्रवेश गर्न लागेका हुन् । 

पार्टी प्रवेशका लागि उनी अहिले काठमाडौं आउँदैछन् । आजै पार्टी प्रवेश गर्ने उनले जानकारी दिए । जनआस्थासँग भने,‘म अहिले गाडीमा काठमाडौं आउँदैछु । काठमाडौं पुग्नेबित्तिकै पार्टी प्रवेश कार्यक्रम हुन्छ ।’ पर्साका थारु वि.सं.२०४८ सालदेखि एमालेमा थिए । 

एमालेको पर्सा जिल्ला अध्यक्षमा समेत निर्वाचित भएका उनी २०७० सालको संविधान सभा निर्वाचनमा पर्सा क्षेत्र नम्बर–५ बाट विजयी भएका थिए । 

प्रतिद्वन्द्वी नेपाली काँग्रेसका रमेश रिजालले ९ हजार ३०६ मत प्राप्त गर्दा उनले १० हजार ४५० मत हासिल गरेका थिए । झण्डै साढे तीन दशक एमालेमा बिताएका उनले पार्टीमा विधिविधानभन्दा व्यक्ति हावी भएकाले राजीनामा दिएको बताए । 

उनले भने,‘मुलुकको संविधान,पार्टीको विधानमाथि अध्यक्ष केपी शर्मा ओली हावी हुनुहुन्छ । न उहाँले संविधान मान्नुहुन्छ न विधिविधान । विधिपद्धति नै बिर्सिसकेको पार्टीमा बस्न हुँदैन भन्ने लागेर राजीनामा दिएको हुँ । आज नेकपामा प्रवेश गर्दैछु ।’
सङ्गै अरु नेता जिल्लामै अर्को कार्यक्रम राखेर नेकपा प्रवेश गर्ने थारुले बताए ।