सूर्य थापामाथि लाग्याे उम्मेदवारी खारेजकाे आराेप
एमाले महाधिवेशनमा अध्यक्ष केपी शर्मा ओली प्यानलमा रहेका उम्मेद्वारहरुबीच क्षेत्रीय राजनीतिलाई लिएर विवाद सुरु भएको छ । विवाद उत्कर्षमा पुगेपछि केन्द्रीय सदस्यमा उम्मेद्वारी दिएका धर्मराज गिरीको उम्मेद्वारी नै खारेज भएको बुझिएको छ ।
अनेरास्ववियुका पूर्व उपाध्यक्ष समेत रहेका गिरी भूगोलको राजनीति गर्ने भन्दै ०७४ मा गृह जिल्ला प्युठान फर्किएका थिए । त्यसयता सोही जिल्लाका अर्का नेता सूर्य थापासँग शक्ति सघर्ष चल्दै आएको बताइन्छ ।
जारी महाधिवेशनमा अध्यक्ष ओलीको प्यानलबाट उम्मेद्वारी दिएका गिरीविरुद्ध रुकुम पूर्वका एमाले अध्यक्ष लिलामणि गौतमले उजुरी दिएका हुन् । ४० वर्षमुनिका युवा आरक्षणमा लुम्बिनी (भूगोलतर्फ)बाट उम्मेद्वारी दिएका गिरीको सदस्यता त्यहाँबाट नभई उपत्यकाबाट भएको दावीसहित गौतमले निर्वाचन आयोगमा उजुरी दिएपछि उम्मेद्वारी खारेजीको अवस्था आएको हो ।
यसरी गिरीको उम्मेद्वारी नै खारेज हुनेगरी गौतमलाई उजुरी हाल्न भने उनै सूर्य थापाले उक्साएको बताइन्छ । स्रोतका अनुसार गिरीको सदस्यताबारे यसअघि गौतमलाई थाहै थिएन । क्षेत्रीय राजनीतिमा चुनौती दिएका गिरीलाई ‘साइड’ लगाउन थापाले नै गौतमलाई सदस्यताबारेको सूचना चुहाएको एक नेताले जानकारी दिए ।
केन्द्रीय सदस्यमा स्वतन्त्र उम्मेद्वारी दिएका गौतमलाई थापाले ‘तपाईलाई नै सजिलो हुन्छ’ भन्दै उजुरी हाल्न सल्लाह दिएकाे स्राेत बताउँछ। जारी महाधिवेशनमा थापा स्वयं पनि ओली प्यानलका केन्द्रीय सदस्यको उम्मेद्वार हुन् ।
टिप्पणीहरू