जेन जी बताउने शाही होटल पुगेपछि असई

आफूलाई जेनजी भन्दै सरकारी कर्मचारीलाई धम्की दिएका अर्जुनबहादुर शाहीले नेपाल प्रहरीको परिचय पत्र समेत दुरुपयोग गरेको खुलेको छ । उनले प्रहरी सहायक निरिक्षक (असई) कुमार शर्माको परिचय पत्र देखाएर विभिन्न होटलमा बसेको पाइएको हो । 

हिजो कोटेश्वरबाट पक्राउ परेका शाहीले उक्त परिचय पत्र भदौ २३ र २४ गतेको प्रदर्शनको क्रममा लुटेको हुनसक्ने अनुमान गरिएको छ । उनले उक्त परिचय पत्र देखाएर केही दिनयता चावाहिलका होटलमा बस्दै आएको प्रारम्भिक अनुसन्धानबाट खुलेको हो । 

ठगी र बैंकिङ कसुरको मुद्धा खेपिरहेका शाही पछिल्लो समय आफूलाई जेनजी बनाउँदै सरकारी अड्डाहरुमा पुगेर कर्मचारीलाई धम्कीपूर्ण निर्देशन दिदै आएका थिए । अछाम घर भएका शाही इलाम-२ मा भएको उपनिर्वाचन (०८१ बैशाख)मा उम्मेद्वार समेत बनेका थिए । तर उनले ५५ मत मात्र पाएका थिए ।