बालेनविरुद्ध खनिएका भुसालको छुट्टै भेला, रविलाई भेट्दै

आफूलाई समाजिक अभियन्ता दावी गर्ने डा. निकोलस भुसालले संविधान खारेजीको माग गर्दै युवा भेला गर्न लागेका छन् ।

प्रधानमन्त्री सुशीला कार्कीले हिजो देशवासीको नाममा सम्बोधन गर्दै फागुन २१ गते हुने प्रतिनिधिसभा निर्वाचनपछि मात्रै संविधान संशोधन गर्न सकिने बताएपछि भुसाल समूह असन्तुष्ट हुँदै अर्को तयारीमा जुटेको हो । जेन-जी प्रदर्शनमा समेत देखिएका भुसाल विगतदेखि नै प्रत्यक्ष निर्वाचित कार्यकारी प्रमुखको पक्षमा थिए । 

उनले आफ्ना समर्थकहरूलाई आज दिउँसो ३ बजे बत्तिसपुतलीस्थित होटल तपसमा उपस्थित हुन आह्वान गरेका छन् । जेन-जीका हत्यारालाई यथाशीघ्र पक्राउ, आन्दोलनले उठाएको माग पूरा गर्न र अन्तरिम संविधान जारी गर्ने वातावरण बनाउन कार्की नेतृत्वको अन्तरिम सरकारलाई कात्तिक १४ गतेसम्मको अल्टिमेटम दिने भुसाल समूहको निर्णय छ ।

राष्ट्रिय स्वतन्त्र पार्टीका सभापति रवि लामिछानेलाई भेट्न भोली नख्खु कारागार जान लागेको पनि उनले जानकारी दिएका छन् । 

पछिल्ल्लो समय काठमाडौँ महानगरपालिकाका मेयर बालेन साहको चर्को आलोचना गर्दै आएका भुसाल अन्तरिम सरकारमा आफू वा आफू निकटका कुनै व्यक्तिलाई मन्त्री बनाउन चाहन्थे । तर, प्रधानमन्त्री कार्की र बालेनले वास्ता नगरेपछि तिल्मिलाएका यिनी सरकार नै विदेशीले बनाइदिएको भन्दै हिँडेका छन् । 

‘मलाई अमेरिकन एम्बेसी र इन्डियन एम्बेसीमा गएर भेट भनियो, म किन जाने !’, हालै एक पोडकास्टमा भनेका छन्, ‘बालेनप्रति मेरो अब कुनै विश्वास छैन, उनीभन्दा म अब्बल छु, चाहिएको बेला नआउने ! अब म नै पहिलो प्रत्यक्ष निर्वाचित कार्यकारी प्रधानमन्त्री बन्ने हो ।’

उक्त पोडकास्टमा भुसालले बालेन बाह्य शक्तिबाट बढी प्रभावित भएको र जेन-जी प्रदर्शनको मुनाफा लिन खोजेको आरोपसमेत लगाएका छन् ।