ऐन महरकी पत्नीबिरुध्द पनि पक्राउ पुर्जी जारी

जन आस्था

भदौ ११, २०८२

युवतीको चरित्र हत्या गरेको आरोपमा समातिएका एमाले नेता ऐनबहादुर महरलाई थुनामा राखेर अनुसन्धान गर्न प्रहरीले म्याद थपको अनुमति पाएको छ ।

पीडित भनिएकी रश्मिला धामीले हुलाकमार्फत दिएको जाहेरीका आधारमा जिल्ला अदालत काठमाडौँले पक्राउ पुर्जी जारी गरेपछि महरले आज साइबर ब्युरोमा आत्मसमर्पण गरेका थिए । त्यसलगत्तै प्रहरीले उनलाई म्याद थपका लागि अदालतमा उपस्थिति गराएकोमा अनुमति मिलेको हो ।

प्रहरीका अनुसार महरकी पत्नी सनुजा श्रेष्ठविरुद्ध पनि पक्राउ पुर्जी जारी भएको छ । अस्कल क्याम्पसको उपप्राध्यापकसमेत रहेकी एमाले नेत्री उनी भने पक्राउ परेकी छैनन् ।

महरले आफूलाई जबर्जस्ती करणी गरेको जिकिर लिएर अड्डा-अदालत धाइरहेकी उनै रश्मिलाले महर दम्पतिविरुद्ध जाहेरी दिएकी हुन् । जाहेरकर्ताले विद्युतीय कारोबार ऐन अनुसार कारबाही गर्न माग गरेको बताइएको छ ।