बिल बिजक जारी नगर्ने बिक्रेतालाई विभागको चेतावनी

वाणिज्य आपूर्ति तथा उपभोक्ता संरक्षण विभागले वस्तु तथा सामान खरिद गर्दा बिल बिजक जारी नगर्ने बिक्रेतालाई कारबाही गर्ने चेतावनी दिएको छ ।

बजार अनुगमनका क्रममा बिना लेबलका सामान बेचबिखन तथा बिल बिजक जारी नगरेको पाइएको भन्दै विभागले यस्तो चेतावनी दिइएको हो । विभागद्धारा आज जारी विज्ञप्तिमा डिलर, खुद्रा तथा थोक बिक्रेताहरुलाई अधिकतम खुद्रा बिक्री मूल्य (एमआरपी) सहितको लेबल लगाएका वस्तु बिक्री र अनिवार्य रुपमा बिल बिजक जारी गर्न निर्देशन दिइएको छ ।

भोक्ता संरक्षण ऐन, २०७५ को दफा ६ को (३) को उपदफा (२) बमोजिम लेबलमा उल्लेख गर्नुपर्ने कुराहरु सर्वसाधारणले बुझ्नेगरी नेपालभित्र उत्पादन भएका वस्तुहरु भए उत्पादक र पैठारी (आयात) गरिएका वस्तुहरु भए पैठारीकर्ताले नेपाली वा अंग्रेजी भाषामा लेख्नुपर्ने र सोही ऐनको दफा ६ को (४) मा उपदफा (३) बमोजिम अधिकतम खुद्रा बिक्री मूल्यसहितको लेबल नलगाइएको वस्तु नेपालमा पैठारी र बिक्रीवितरण गर्न नपाइने कानूनी व्यवस्था छ ।

विभागले भनेको छ, ‘उल्लिखित ऐनको भावना र मर्मविपरीत अब उप्रान्त कुनै स्वदेशी उत्पादक र पैठारीकर्ताहरुले लेबलमा (उत्पादकको नाम र ठेगाना, दर्ता नम्बर, ब्याच नम्बर, उत्पादन मिति, उपभोग गरिसक्नुपर्ने मिति, अधिकतम खुद्रा बिक्री मूल्य, परिमाण, तौल, गुणस्तर) उल्लिखित विवरण र सोमा हुनुपर्ने विवरणहरु उल्लेख गरी बिक्रीवितरण गर्नहुन अनुरोध छ ।’