पूर्वराजालाई सिंहासनमा नराखेसम्म राजावादीहरुले विश्राम नलिने

पूर्वराजा ज्ञानेन्द्र शाहलाई गद्दीमा नफर्काएसम्म सडक संघर्षबाट पछि नहट्ने उद्घोषसहित आज काठमाडौँमा शक्ति प्रदर्शन गरेका राजवादीहरुले भोलि पनि आन्दोलन गर्ने बताएका छन् । नवराज सुवेदी नेतृत्वको ’राजसंस्था पुनस्र्थापनाका लागि संयुक्त जनान्दोलन समिति’ को अगुवाइमा भएको आजको प्रदर्शन सकिएको छ । 

दिउँसो काठमाडौँ उपत्यकाका विभिन्न सात स्थानबाट निस्किएको जुलुस रत्नपार्कमा पुगेर विरोध सभामा परिणत भएको थियो । सभामा बोल्ने राजावादीहरुले आन्दोलनलाई निरन्तरता दिने घोषणा गरे ।

राष्ट्रिय प्रजातन्त्र पार्टी (राप्रपा)का अध्यक्ष राजेन्द्रप्रसाद लिङदेनले गणतन्त्र नढलेसम्म आन्दोलन नरोकिने स्पष्ट पार्दै आजको प्रदर्शनलाई ‘कास्टिङ’ मात्र भएको बताए । भोलिदेखि आन्दोलन थप चर्काउन उनले कार्यकर्तालाई अपिल गरेका छन् । 

‘गणतन्त्रको जग कत्तिको कमजोर छ भन्ने आजको जनसागरले देखायो । एमालेको सरकारी खर्चमा भएको जुलुस र राजावादीको प्रदर्शनले जनमतसंग्रह गरेको हो’, उनले भने, ‘यो आन्दोलन पार्टी र संस्थाको होईन । नेपालका लागि नेपाली जनताले गरेको आन्दोलन हो सबै मिलेर सफल पारौँ ।’

राप्रपा नेपालका अध्यक्ष कमल थापाले पनि आन्दोलन निरन्तर अघि बढ्ने बताएका छन् । उनले राजसंस्थालाई षड्यन्त्रमूलक ढंगले पाखा लगाइएको भन्दै प्रमुख राजनीतिक दलका नेताप्रति रोष प्रकट गरे । 

‘नेपाली जनताको आवाजलाई प्रमुख राजनीतिक दल भन्नेहरुले सुनोस् । जनताको भावना र आवाजलाई कुल्चने काम सह्य हुँदैन । राष्ट्रिय एकताको प्रतीक राजसंस्था हो । जनतासँग मिलेर प्रजातान्त्र स्थापना गर्ने राजसंस्था नै हो’, उनले भने, ’संविधानसभामा छलफल नगरी राजसंस्था पाखा लगाइयो । राजसंस्था पुनस्र्थापना गर्न जनआन्दोलनको पहिलो दिन हो आज ।’

गणतन्त्रले जनतालाई भ्रष्टाचार र कुतन्त्रबाहेक केही नदिएको दाबी गरेका थापाले सीमित नेताहरुले सिण्डिकेट गरेर लुटतन्त्र चलाएको आरोप पनि लगाए । बन्दुक बोकेर लड्नेहरु विदेशिन बाध्य भएको तर नेताहरु भने खर्बपति भएको उनको भनाइ थियो । 

उनले भोलि मध्यान्ह १२ बजे नाराजुलुससहित माइतीघर मण्डला र बिजुली बजारमा उपस्थित हुन कार्यकर्तालाई निर्देशन दिएका छन् ।

आजको सभामा शिवसेना नेपालका अनिल बाबा बस्नेतले पनि भाषण गरे । वाह्य शक्तिले गणतन्त्र थोपरेको भन्दै उनले विदेशीको दासत्व स्वीकार नगर्ने बताए । देशलाई हिन्दु राज्य कायम नगर्दासम्म थकाइ नमार्ने उनको उद्घोष थियो ।

राप्रपाका वयोवृद्ध नेता पशुपतिशमशेर जबरा पनि आज चर्कैसँग प्रस्तुत भएका थिए । उनले भने, ‘बहुमूल्य प्रजातन्त्रमा जनताले चुनिने र जनताको मतको कदर हुनुपर्छ । राष्ट्रपतिलाई म चुनौती दिन चाहन्छु सँधै यस्तै हुँदैन । दक्ष र इमान्दार मान्छेको देशमा आवश्यकता रहेको छ । जुन राजासहितको हिन्दु राज्य भएपछि मात्र पूरा हुनेछ ।’

देश भताभुङ्ग भएकाले सम्हाल्न राजा चाहिने अर्का राजावादी नेता डा. प्रकाशचन्द्र लोहनीको भनाइ रह्यो । सबै शक्तिलाई ठाउँ दिनुपर्ने उनको माग छ । ‘हाम्रो आस्थाको केन्द्र हिन्दु राष्ट्रसहितको राजतन्त्र आवश्यक छ । सबै शक्तिलाई ठाउँ दिउँ । र निष्पक्ष राज्यको परिकल्पना गरौँ’, लोहनीले भने, ‘देशमा पैसाको कमी छैन । मियो गतिलो नभएर मात्र हो ।’

यस्तै अवस्था रहिरहे जनता सँधै शान्तिपूर्ण रुपले प्रस्तुत नहुने भन्दै उनले सरकारलाई चेतावनीसमेत दिएका छन् ।